DIGOS CITY -- Gikompirma sa kapulisan sa Matanao Police Station nga gidali nila paghatod sa tambalanan sa dakbayan ang napriso nga si Matanao Mayor Butch Fernandez.
Nasayran atol sa clarificatory hearing sa kaso nila ni kanhi Davao del Sur governor Douglas Cagas ug Mayor Fernandez didto sa Regional Trial Court (RTC) Branch 21 niadtong Martes sa hapon, gimando ni Presiding Judge Loida Posadas-Kahulugan, ang pagbalhin kang Fernandez sa kustodiya sa Provincial Rehabilitation Center (PRC) gikan sa kapulisan sa Matanao.
Apan sa pagpanubay sa Sun.Star SuperBalita, gikompirma ni Senior Inspector Elmer Cabuslay, hepe sa Matanao Police, nga gisud nila sa Digos Doctors Hospital si Fernandez tungod kay nitaas ang blood pressure niini.
"Gi-inform namo si Judge nga mao na ang nahitabo kay niabot sa kapin 200 ang iyang BP," asoy ni Cabuslay.
Gitataw sab niini nga di na kinahanglan ang court order sa mga takna sa emerhensiya.
Gidason ni Cabuslay nga mahimong dalhon na si Fernandez sa PRC kun makagawas na kini sa bay tambalanan, sigun sa mando sa korte.
Samtang gitakda ang arraignment nila ni Cagas ug Fernandez sa Hunyo 23.
Gitakda sab nga ipresenta sa korte ang mga akusado nga gi-ingong mao'y nagsugo sa pagpatay sa mamahayag nga si Nestor Bedolido niadtong Hulyo 2010.
Si Cagas ang nagpabilin sa kustodiya sa Bureau of Jail Management and Penology, subay sa mando sa korte.
Hinuon, sa paghupot ni Kahulugan sa maong kaso human nibalibad ang duha ka mga huwes sa RTC, nalipay ang prosekusyon ug depensa sanglit parehong naghuwat kini og resolusyon sa maong kaso.
Gitakdang dunggon sab sa korte ang mosyon nga makapiyansa ang mga akusado kinsa nagpabiling inosente sa pasangil kanila ug naglaum nga makaangkon sa temporaryong kagawasan una sugdan ang pagdungog sa kasong murder sa Septyembre. (OBD)