TALIWA sa mga kontrobersiya nga naghamok sa Department of Justice (DOJ), si President Rodrigo Duterte nikompirmar nga gidawat ang resignation ni Justice Secretary Vitaliano Aguirre II.
Si Duterte, sa iyang pagpamulong kagahapon, wa mohatag og detalye sa resignation ni Aguirre, apan niingon nga nangita siya og ikapuli nga bag-ong pangulo sa DOJ.
“I accepted the resignation (of) Vit Aguirre,” matod sa Presidente sa usa ka kalihukan sa Malacañang.
“I am now looking for replacement,” matod niya.
Ang Presidente nakahukom niini human ang Task Force on Anti Illegal Drugs, sa usa ka rekomendasyon nga gipirmahan niadtong Disyembre 20, 2017, apan gipahibawo sa publiko niadtong Marso 22, nagrekomendar sa pag-dismiss sa kaso batok sa gikatahapang dagkong drug lords nga sila si Kerwin Espinosa, Peter Lim ug kaubanan.
Nipahibawo sab si Aguirre sa pagbutang kang pork barrel scam mastermind Janet Napoles ubos sa partial coverage sa witness protection program.
Si Aguirre nihatag sa iyang resignation duha ka mga semana human sa pagpahibawo sa hukom sa task force sa DOJ. (Sunnex)