DAVAO DEL NORTE -- Sikop sa kapulisan ang gikonsiderang ikaduha sa listahan sa pinaka-banggiitan nga tigpayuhot og ilegal nga druga sa probinsiya alas 4:00 sa hapon, Miyerkules, didto sa Purok 1, Barangay Cambanogoy, Lungsod sa Asuncion.

Nasikop sab ang lider sa Rap Rap Criminal Gang nga gi-ilang si Ralph Quinnimon Caña, molupyo sa nahisgutang lugar.

Nakuha gikan kaniya ang usa ka kalibre .45 nga pistola. usa ka magasin sa kalibre .45 nga pistola, usa ka 105mm mortar arsenal, upat ka dagkung plastic sachets nga dunay 15 gramo nga shabu, duha ka gagmay nga sachets sa upat ka gramo nga shabu nga nagkantidad og P170,000, usa ka timbangan, usa ka itom nga bag, siyam ka mga buhing bala sa kalibre .45 nga pistola, tulo ka mga buhing bala sa 5.56mm nga pusil, ug upat ka mga buhing bala sa kalibre 38.

Laing nakuha gikan sa suspek mao ang 15 ka tag-P100 nga salapi, upat ka P50 nga salapi, usa ka P500 nga salapi, ug 5 ka P100 isip markadong salapi, duha ka mga lighters, usa ka unit sa Honda XRM nga motor, ug boodle money.

Sumala pa nga nadakpan ang suspek sa gilusad nga drug bust operation sa hiniusang puwersa sa kapulisan sa probinsiya.

"Mag-isa lang po siya, Ma'am. Hindi na po siya nakapalag," tug-an ni Police Chief Inspector Michael Seguido, hepe sa Asuncion Municipal Police Station.

Nasayran nga taud-taod na nga gimonitor sa kapulisan ang suspek ug nakompirma sa otoridad ang kalihukan niini sa mga kasikbit nga munisipalidad.

"Opo. Sa profiling natin, may access po siya sa ibang municipality," dugang ni Seguido.

Dakung kalampusan matud pa sa kapulisan ang pagkasikop sa suspek kay tungod niini napiang ang operasyon sa ilegal nga druga sa tibuok probinsiya.

Kasamtangang nabalhog sa selda sa Asuncion MPS ang suspek. (Domilyn Ramos Pico)