GIMANDO sa Office of the Ombudsman (OMB) Mindanao ang pagtaktak sa usa ka special collecting officer sa National Bureau of Investigation Southeastern Mindanao Regional Office (NBI-Semro) human napamatod-an nga sad-an sa kasong grave misconduct and serious dishonesty sa paggamit sa koleksiyon alang sa iyang personal nga negosyo.

Si Special Prosecution Officer I Pillar L. Constantino, sa desisyon pinetsahan niadtong Pebrero 10 ug naaprobahan ni Deputy Ombudsman for Mindanao Rodolfo Elman, nagmando sa pagtaktak kang NBI-Semro Administrative Aide VI Severito A. Castillo isip Special Collecting Officer.

Napamatud-an ni Constantino nga si Castillo sad-an base sa reklamo sa Commission on Audit (COA) Davao nga nag-ugat gikan sa way lagda nga suwat pinetsahan og Agosto 9, 2010 pinaagi ni Presidente Benigno Aquino III, Graft and Corruption Movement Mindanao, Davao City nga gi-address ngadto sa chairman sa Civil Service Commission (CSC) nga gi-refer ngadto kang Ombudsman Merceditas N. Gutierrez.

Ang maong sulat nag-alegar kang Castillo nga nakahimo og iregularidad kabahin sa NBI clearance applications ug sertipikasyon nga naglakip sa non-remittance sa iyang koleksiyon kantidad og P900,000 nga gi-ingong gigamit sa iyang personal nga negosyo.

Ang reklamo gi-endorso ni abogada Maria Corazon A. Arancon, Director IV sa OMB-Mindanao, ngadto kang Acting Regional Director sa NBI-Semro Max B. Salvador pinaagi sa first endorsement pinetsahan Agosto 23, 2011 alang sa "conduct of a discreet fact-finding investigation."

Si Salvador, sa suwat pinetsahan Septyembre 19, 2011, nagpahibawo nga ang respondente nga siya ipailawom sa audit ug ang "matter was already elevated to their main office."

Gisundan kini sa imbestigasyon nga gilusad sa OMB-Mindanao Associate Graft Investigation Officer III Cezar D. Rañeses nga girekomendar pinaagi sa hangyo sa audit results gikan sa COA Davao Region.

Sa counter-affidavit ni Castillo, pinetsahan niadtong Nobyembre 7, 2014, matud niya nga "he had already fully settled his accountabilities in the amount of P153,545 and declared that he had submitted his unused official receipts to the stockroom of the NBI Central Office."

Apan si Constantino misulti nga ang rekord nagpakita nga si Castillo "unlawfully and wrongfully used his position to obtain monetary benefit for himself," busa sad-an siya sa grave misconduct and serious dishonesty.

Hinuon, si Constantino nagkanayon nga ang respondente "not guilty" sa gross neglect of duty tungod "his delay in submitting his reports of collections and deposits is a mere consequence of his misuse of the funds" ug nga "there is no definite evidence that the loss of the 151 pieces of official receipts can be attributed to respondent's fault or negligence."

Ang resolusyon nagmando sab nga ang multa ikonberter ngadto sa kantidad sa iyang katapusang suweldo sulod sa usa ka tuig, kon ang pagtaktak di na mapatuman tungod sa iyang paghawa sa NBI-Semro, ug iyang ibayad ngadto sa Office of the Ombudsman.

Ang multa mahimong i-deduct sa retirement benefits sa respondente, leave credits o bisan unsa nga iyang madawat gikan sa gobyerno.

Dugang pa, gimandoan ang regional director sa NBI-Semro nga si lawyer Dante A. Gierran nga ipatuman ang "penalty of dismissal" ngadto kang Castillo sud sa 10 ka adlaw gikan sa pagdawat sa resolusyon.