LUHO nga awto ug mga jet ski ang gisakmit sa Bureau of Customs Port of Cebu sa gipahugtan nga kampanya batok sa smuggling.
Si Customs Commissioner Isidro Lapeña ang nangu sa pag-abli sa container vans kagahapon sa Cebu International Port diin dunay sud nga duha ka bag-ong Kawasaki jet skis ug second-hand nga Porshe sports car nga model 2008.
Ang duha ka jet skis nga gibanabanang nagbalor og P300,000 hangtod sa P400,000 matag unit ug ang Porshe nga gibanabanang nagkantidad og P1 milyon hangtod sa P1.5 milyones kay pulos gikan sa Estados Unidos, matod ni Lapeña.
Sumala ni Cebu District Collector Elvira Cruz ang duha ka jet skis kay gisakmit niadtong Marso 27 gumikan sa misdeclaration nadiskobrihan kini nga gisulod og apil sa 40-footer container van kuyog sa personal effects nga gisulod sa Balikbayan boxes atol sa X-ray scanning.
Ang misdeclared nga shipment nahiabot sa pantalan sa Sugbo niadtong Pebrero 6 nga naka-consigned sa usa ka kompaniya nga nagbase dinhi.
Samtang, matod ni Cruz ang two door nga Porsche gideklarar sa tag-iya pag-abot sa CIP sa miaging buwan, apan kuwang og certificate of authority to import nga gikinahanglan sa Department of Trade and Industry subay sa Executive Order 156 as amended sa Executive Order 877-A.
Si Lapeña nipasabot ang shipment nga gikan sa gawas sa nasod kinahanglan nga dunay permit to import ug kinahanglan nga mobayad ang tag-iya niini katunga sa balor sa shipment. (SCG)