SA pagpangulo sa trayanggulo nila ni Lawrence Domingo, Justin Brownlee ug Renaldo Balkman, ang San Miguel-Alab Pilipinas nakaabante sa semi-finals sa ASEAN Basketball League.
Nagsilbeng agianan sa Alab Pilipinas paingon sa semis mao ang ilang kadaugan batok sa host Saigon Heat, 96-85, sa Game 2 nga maoy nagtiklop sa ilang best-of-three quarter-finals series sa miaging gabii sa CIS Arena sa Ho Chi Minh City.
Si Domingo nagpakatap og 21 puntos sa 9-of-10 shooting, nitunol sab og 21 puntos ug 12 rebounds si Balkman samtang niamot og 18 puntos si Brownlee alang sa Alab Pilipinas.
Ang Alab Pilipinas mingdaog sa Game 1, 110-100, sa miaging semana.
Ang Saigon Heat ningkombati nga wala ang ilang headcoach nga si Kyle Julius, kinsa gisuspenso sa series human natawagan og duha ka technical fouls sa Game 1.
Gikan sa 15 puntos nga biya, ang Saigon ming-aksyon og gukod ug nakaduol sila, 81-89, sa 4th quarter, apan kadto ray ilang duol nga nahimo. (ESL)