MANILA - For the nth time, nag-block screening ang award-winning nga pelikulang “Bhoy Intsik” nga gibituonan ni RS Francisco ug Ronwaldo Martin, manghod ni Coco Martin.
Gipahigayon ang block screening sa pinakadakong cinema sa Gateway Mall niadtong Dominggo sa gabii. Apan kay daghan ang wala makasud, nag-decide si RS nga mag-second screening.
Ang wa makasud sa unang screening, naghuwat og duha ka oras una sila nakasud. Nakita kong nitan-aw ang Comedy Queen nga si Ai Ai delas Alas kauban ang iyang bana. May mga rapper ug mga bag-ong artista nga wa pa nako mailhi ang pangan, mga social media influencers ug uban pa including movie producer/beauty queen Joyce Penas Pilarsky.
Katulo na to nakong tan-aw sa Bhoy Intsik pero nakahilak gihapon ko. Ang kanunay kong hilakan ang eksena, diin nabayran na ni Bhoy Intsik (RS Francisco) ang atrasong P250k sa iyang anak-anakan nga si Marlon (Ronwaldo Martin). Ilabi na dihang gibutyag ni Bhoy Intsik nga ang kwartang iyang gibayad sa mga sindikato, gikan sa halin sa usa ka mata nga iyang gibaligya (sabay hubo sa iyang shades).
Pagkahuman sa first screening, ang tanan gustong magpa-selfie kang RS. Nakakita kog chance nga makapangutana ug kini makita sa akong Youtube Account.
Manggiuwawon diay ni si Ronwaldo Martin ug dili siya anad magpa-interview. Pero dili na siya matawag nga baguhan kay pila na ka indie films ang iyang nahimo.
Matud ni RS, ang pagkamauwawon ni Ronwaldo kalit nga mahanaw sa dihang magsugod na ang take.
Sakto tungod kay sa mga pipila ka mga pelikulang nahimo ni Ronwaldo, like “Pamilya Ordinaryo” ug sa “Bhoy Intsik,” abi nako og astig siya in real life pero bali diay.
Matod usab ni RS nga apil ang Bhoy Intsik sa umaabot nga international film festival sa France.
So far, duha na ka best actor trophy ang nakuha ni RS sa maong pelikula. Ang una mao ang sa Sinag Maynila last year ug sa Star Awards For Movies last February.
Very confident ang movie producer/beauty queen nga si Joyce Penas Pilarsky nga si RS ang modaug nga Best Actor sa France tungod kay bilib siya sa istorya ug sa acting ni RS Francisco. Hinaut mag-dilang anghel si Madam Joyce.