POSIBLE nga dili pa motapos ning tuiga masugdan na pagtukod ang Cebu City Medical Center human anaa na’y lowest complying responsive bidder ang phase 1 niini.

Kagahapon gipahigayon ang bidding sa Cebu City Hall alang sa posible nga motukod sa unang bahin niini.

Aduna’y lima ka mga construction company ang nisuway pag-bid apan tulo lang niini ang nakatuman sa gikinahanglan nga dokumento.

Ang WTG-AM Oreta Construction ug Dakay Construction pareho nga wala’y blue print sa plano niini nga gisumiter sa Bids and Awards Committee hinungdan nga dali kini nga gitang-tang sa listahan sa mga mo-bid unta niini.

Nakuha sa CE Padilla, usa ka Quezon City-based nga kompaniya ang labing ubos nga bid nga P514.9 milyon kini.

Samtang ikaduha ang SCDI Construction nga aduna’y bid nga P530 milyon ug EM Cuerpo Construction nga aduna’y bid nga P533.8 milyon.

Matod sa chairman sa special BAC sa CCMC nga si Atty. Jose Marie Poblete nga ipaubos pa sa post-qualification ang CE Padilla aron masigurado nga tukma ang bid niini sa gastohan sa phase 1 sa maong tambalanan.

“Under the rules ang iyang man gud bid karon while lowest siya as read, it will be subjected to arithmetical computation meaning tan-awon nato if nitakdo iyang amount diri sa mga details,” si Poblete ning nahinabi sa tigbalita kahagapon.

Dugang ni Poblete nga kon wala sila’y makita nga kakulian sa dokumento sa maong bidder i-endorso na dayon kini nila ngadto sa mayor aron ma-awardan na kini isip winning bidder sa CCMC Phase 1 construction.

Apan kon aduna sila’y makita nga problema o wala pagtakdo sa dokumento niini sa ilang bid amount i-hatag ang katungod sa ikaduha nga aduna’y ubos nga bid ug ipahigayon na usab ang post qualification niini.

Giingon nga pito ka adlaw bag-o mahibaw-an sa publiko kon ang CE Padilla na gyud ang makadaog sa bid sa katukoran sa maong tambalanan.

Matod ni Poblete nga positibo siya nga sa ikatulo nga quarter sa tuig 2015 masugdan na pagtukod ang CCMC.