DUNAY agresibo nga paningkamot ang administrasiyon ni Presidenti Rodrigo Duterte pag-undang niining pangabuso sa mga overseas Filipino workers didto sa Middle East.
Gani, gidid-an na karon sa gobiyerno pagpada og mga trabahanti didto sa Kuwait human sa kamatayon ni Joanna Demafelis sa kamot sa iyang agalon.
Niadtong Abril sa miaging tuig, niperma og kauyonan si Duterte uban sa gobiyerno sa Riyadh alang sa paghatag og igong proteksion sa mga trabahanti nga Filipino.
Ning bag-o, ang gobiyerno sa Kuwait niuyon nga hapsayon nila ang kondisiyon sa pagtrabaho sa mga Filipino sa ilang nasod.
Ang pangutana, mao na ba gyud kini ang solusiyon aron malikayan na kining pagdaogdaog, pagpangabuso, pagpanlupig ngadto sa mga OFW?
Niadtong wala makasulay og trabaho gawas sa nasod, tingali mouyon ta sa paningkamot ni Duterte paghimo og kauyonan ug kasabotan sa ubang nasod.
Apan, atong hinumdoman bisan pa nilibo ka mga balaod pagprotiher sa mga OFW dili gyud nato malikayan kining pangabuso. Ngano man?
Una sa tanan, matag nasod dunay kaugalingon kultura nga lahi sa mga Filipino.
Ang uban kanila, giisip nila ang mga OFW nga "ulipon" -- nagpasabot sama sa karaang panahon pwede nila buhaton sa usa ka ulipon ang bisan unsang butang nga gusto nila.
Gawas sa kultura, duna poy mga kinaiya kining ubang mga langyaw nga dili morespeto sa mga dayo.
Kining mga pangabuso wala kana maglimit sa mga langyawng nasod diin nanarbaho ang mga OFW.
Bisan mismo sa atong tugkaran, naa kining pangabuso sa atong mga trabahanti ug suloguon.
Busa, masabtan nato nga dili magdependi sa balaod o kultura sa usa ka nasod aron mapugngan ug malikayan kining pangabuso.
Magdependi gyud kana sa matang sa imong agalon, sa iyang pagkatawo. Kon imong agalon nahibaw ug mahadlokon sa Ginoo, siyempre makita kana sa iyang gawi ug pagtratar sa iyang isig-katawo.
Apan, sa nasod nga dili Kristohanon, sa nasod nga nagpasuwahi ang kadaotan -- unsa may mapaabot nato diha sa panimay nga atong alagaran kon ang tanang daotang impluwensiya sa palibot anaa usab diha.
Hinuon, mas bentaha kon duna kining kauyonan sa matag nasod pagprotehir sa tawhanong katungod.
Sa akong kasinatian pagtrabaho gawas sa nasod, daghang higayon nga atong nasaksihan kining pagpangabuso sa agalon ngadto sa OFW.
Kadaghanan kanila "mopiyong nalang" moantos sa pangabuso ug mosakripisyo kay dili pa andam mopauli sa Pilipinas.
Kon moparehas na atong ekonomiya sa Japan o Korea, tingali wala nay magtinguha og abroad ug wala na say maabusohan.