PORMAL na nga gimugna ang Task Force Hapsay Kable human nga gipirmahan ang memorandum of understanding (MOU) sa buhatan sa mayor didto sa City Hall sa dakbayan sa Cagayan de Oro.
Atol sa flag raising ceremony, gipirmahan sa managlahing sektor ang dedication wall diin pagmatuod nga hugot ang suporta niini sa maong katuyoan.
Gibutyag sa chairman sa Kapisanan ng Broadcaster ng Pilipinas (KBP) sa Cagayan de Oro sa pakighinabi sa SunStar Superbalita nga importante ang maong kalihokan gumikan alang kini sa kaayohan sa tanan.
“Formal nga memorandum of understanding between the City Government of Cagayan de Oro ang atong chairman niini, of course, ang atoa mang mayor, Mayor Oscar, kita sa KBP,, kita ang in-charge sa information, kita, ang general public, atong mapahibalo sa tanan nato nga mag aktibidades sa tibuok siyudad, asa ang activity nga kana nga kalsada di pa-agian kay naa’y paglimpyo dinha,” pahayag ni Monterde.
Nagmapasalamaton usab kini gumikan kay gilangkoban sa nagkalain-laing mga stakeholders ang misalmot niini kinsa usab mipirma sa dedication wall diin kasagaran niini mao usab ang mga tag-iya sa mga kable nga anaa sa poste.
“Importante kaayo ni no kay this is the first in our city nga sauna duna’y task force bundling lang karon ang atong task force i-hapsay gyud ang tanang mga kable, tanang mga messy, spaghetti wires tangtangon. Atong limpyohan, tanggalon na ang tanang mga unhealthy, unused wires sa mga nagkalain-lain nga mga stakeholders,” dugang pa niini.
Kani matud pa ang unang higayon dinhi sa siyudad ug malipayon kini kay ubay-ubay ang buot nga mosalmot niini.
“First time ni sa siyudad unya nalipay ta kay kini nga task force gi-apilan sa tanang mga stakeholders. Of course, gi-apilan ug makita nato sa dedication wall nga kana tanan apil, mao pud ang tag-iya sa mga cables nga naa diha sa mga poste,” saysay niini.
Gipirmahan ang dedication wall sa mga representate sa nagkadaiyang mga buhatan ug stakeholders diin gipangulohan kini sa City Government sa Cagayan de Oro inubanan sa KBP, Cepalco, Cocpo, Misortel, Smart, Moresco-1, PLDT, Cagayan de Oro, ICT Business Council, Jade Cable System Inc., PIA, Globe, Parasat, Philippine Institute of Civil Engineers, Institute of Electronic Engineers of the Philippines, National Telecommunication Commission ug uban pa.