SUWERTENG bata.

Scholarship gikan sa kindergarten hangtod sa medical school ang madawat sa labing una nga bata nga gipanganak diha sa bag-o lang nag-abli nga tambalanan sa North Reclamation Area, Barangay Subangdaku, siyudad sa Mandaue.

Ang 7.10 pounds nga si Michael Fern Augusto Ediong kinsa gihimugso alas 4:55 sa hapon niadtong Martes mao ang labing una nga bata nga gipanganak diha sa University of Cebu Medical Center (UCMed).

Si Janine Ediong kinsa usa usab ka nurse sa maong tambalanan dakong pasalamat sa tigdumala niini tungod sa nadawat sa iyang anak, “I’m very happy, overwhelmed and very thankful to Atty. (Augusto) Go and Ms. Candice (Gotianuy) because of their generosity. “

Ang 30-anyos nga i­­nahan nga si Ediong nibutyag sa Sun.Star Superbalita kon diin niya gikuha ang pangan sa maong bata.

“Michael because both me and my husband are guardian angel of Saint Michael, Fern because of my father’s name Fernando and then Augusto in honor of Atty. Augosto (owner of UCMed),” matod ni Ediong.

Si Ediong kinsa gipaubos sa ceasarian section, nitataw nga ang plano unta nila nga sa Cebu North General Hospital manganak tungod kay head nurse ang iyang bana nga si Dexter Ediong didto.

Apan tungod sa tambag sa assistant chief sa UCMed kaniya nakadesisyon kini nga diha nalang sa maong tambalanan manganak.

Giingon nga ang pa­rehong ginikanan ni Janine, working student sa kaniadto nga pangan sa UC nga Cebu College of Commerce (CCC).

Kapin sa 38-ka tuig na usab ang inahan ni Janine nga si Helen Cabalde nga nagserbisyo sa UC isip teller sa ilang nursing department.

Ang chancellor sa UC nga si Candice Gotianuy nagkanayon usab nga usa ka blessing ang maong bata dili lang sa pamilya niini apan lakip na usab sa maong tambalanan.

“A birth is always a momentus event and it always augurs something good, so we really hope that this is a blessing and we think this is a bles­sing,” si Gotianuy ning ma­hinabi sa Sun.Star Superbalita.

Si Gotianuy usab ang usa sa mamahimong ni­nang sa bata.

Matod niya nga nagsugod sila pag-operate sa ilang ospital niadtong Mayo 1 ning tuiga.

Hinay-hinay usab nila kini nga giablihan diin niagi kini sa phases gikan sa outpatient department, inpatient department ug inpatient surgery, maternity ug sa ilang emergency department.

Nitataw usab si Gotianuy nga gusto nila nga hingpit nga andam aron maserbisyohan nila ang publiko og maayo.