VIGAN CITY, ILOCOS SUR - Dili lang normal nga tinun-ang mga atleta ang nagduwa sa kasamtangang nagpadyaon nga 2018 Palarong Pambansa sa Vigan City, Ilocos Sur, ningkombati sab ang mga tinun-an sa Special Education (SPED).
Ang Central Visayas Regional Athletic Association (Cviraa) adunay 36 ka mga atleta nga apil sa special games.
Usa sa coach niini nga si Grace Batucan, 40, kinsa nagdala sa SPED athletes sa Cebu City, nibutyag sa Superbalita Cebu nga susama ra ang trainer sa atleta sa SPED ug sa normal nga mga atleta.
“Same ra gyud gi-unsa pag-train ang regular,” asoy niya.
Si Batucan, kinsa 16 na ka mga tuig nga nagtudlo espisyal nga mga atleta, sulod na sa duha ka mga tuig nga gitahasan sa Department of Education (DepEd) Cebu City aron mogiya sa mga atleta niini sa SPED.
Usa ka magtutudlo si Batucan sa Bulacao Community School SPED Center sa dakbayan sa Sugbo.
“Usahay mosimang, mao na imong duwaon, magbuot sila sir. Taas nga pasensya gyud ani nila, double ug taas. Kinahanglan watchful pud ka ani nila,” asoy ni Batucan sa Superbalita Cebu kagahapon.
Gibutyag niini nga ang SPED athletes nga gipadala sa Cebu City wala’y mga ginikanan nga kuyog apan aduna’y pipila ka mga atleta nga dala ang ilang paryente o nangapas ang uban hilabi na kadtong taga probinsiya sa Sugbo nga aduna’y gimintinar nga tambal.
Major na gyud ni Batucan ang SPED tungod kay nagsugod siya sa iyang kurso sa kolehiyo mao na gyud kini ang iyang gikuha.
Mas nahigugma siya sa pagtudlo pa sa SPED tungod niadtong 4th year college siya ug gipa-expose sila sa SPED students, naigo iyang dughan dihang gigakos siya sa usa ka tinun-an nga aduna’y down syndrome.
Dihang naminyo si Batucan ug namabdos, gihatagan usab siya sa Ginoo og anak nga aduna’y down syndrome apan wala kini magdugay tugod kay sulod sa usa ka tuig nipanaw ra usab kini kay grabe ang sakit niini.
Lakip sa mga duwa sa SPED athletes mao ang athletics alang sa aduna’y intellectual disability (ID), visually impaired (VI); Bocce alang sa ID; Goal Ball sa VI; ug Swimming sa ID.
Karong adlawa gikatakda nga moduwa ang mga SPED swimmers.
Kauban ni Batucan sa pag-amuma sa SPED athletes sa Cebu City si Jonah Salino, 40, kinsa 11 ka mga tuig na usab nga SPED teacher sa susamang tunghaan. (HBL)