NAGPADAYON ang registration sa second National Amihan Skim Boarding Competition, usa sa sporting events sa mas halapad ug pinakataas nga Visit Davao Summer Fest (VDSF) 2018 program, nga sugdan karong Abril 26 sa Amihan Beach sa Dahican, Mati City, Davao Oriental.
Si Tournament director Pedro Plaza sa Amihan sa Dahican, sa pakighinabi sa Sun.Star Davao, nagsulti nga anaa sa 50 ka skimboarders ang miparehistro na, diin gikinahanglan pa nila og dugang 70 aron makab-ot ang target nilang 120 ka partisipante.
"Paningkamutan jud namo maabot ang target sir, hopefully maabot jud," ni Plaza.
Dugang ni Plaza nga may partisipante gikan Luzon ug Visayas ang mipadayag na sa ilang interes nga moapil sa national skimboarding competition nga motabang sa mga iskolar sa Amhian sa Dahican ug sa ilang regular nga turtle egg hatching tradition.
"We have tough contenders from Leyte and Negros," ni Plaza, diin ang gipasabot mao ang mga eksperto ug sa advance category.
Ang defending champion Lang Aporbo, manghud sa Mati City's pride ug international skimboarding champion Sonny o “Bayogyog,” depensahan ang iyang titulo sa women's division.
Si Plaza nagdugang nga 15 years and below skimboarders maoy manguna sa beginners division.
Ang mga skimboarders, nga nag-edad og 30 anyos pataas ang magtigi sa "Dahong Laya" division.
Ang registration anaa sa P350 apil ang singlet, freebies ug souvenirs.
Dagkong premyo ang nagpaabot sa mga mananaug, diin sa expert, ang kampeyon modawat og P20,000 ug ang mosunod nga duha may tag-P15,000 ug P10,000.
Ang top three advance category winners mobulsa og P15,000, P10,000 ug P8,000.
Ang women's, beginner's ug legend's division top three mouli sab og P8,000, P5,000 ug P3,000. (ABM)