NAGPATUYANG ang mga kritiko ni Mayor Tomas Osmeña. Apan di nila mabaraw ang punto nga gi-bargain diay sa panahon ni kanhi mayor Mike Rama ang SRP.
Lalim bay prime property sa Syudad sa Sugbo igo lang gibaligya og P38,000 matag metro kwadrado sa panahon ni Rama. Apan karon, mapruweba na ni Osmeña nga mahalin man diay kini sa presyo nga P110,000 matag metro kwadrado.
Bisan og mag-Google ka kon pila na ang luna mismo sa downtown area sa Syudad sa Sugbo, moabot na gud og P100,000 matag metro kwadrado. Apan ang labing nindot nga real estate sa syudad gibaligya lang ni Rama og P38,000 per square meter?
Klaro nga gi-bargain ni Rama ang SRP. Ang akong mga pangutana karon, unsang-pagka unsaa nga naingon niini? Wa bay tulobagon ang kanhi administrasyon?
Kay flower na man ang kanhi mayor karon, nag-atang ko nga motingog ang labing dakong ranggo sa oposisyon sa syudad nga mao si Bise Mayor Ed Labella.
Sa mga konsehal, dunay mga post si Konsehal Joy Pesquera sa Facebook. Apan sorry kons kay wa man matunong ang imong tuno. Niingon ka nga duna nay gisabot-sabot ang mayor nga usa ka buyer apan ang imong pruweba nga attachment mao ang news item kabahin sa bidding.
Imong gisumpay ang punto ni kolumnista Bobby Nalzaro nga nangita ang mayor og buyer.
Kadakog kalainan sa nakignegotiate ug nangitag buyer.
Mosumpay lang ko kons nga nakauyon ko niining maong pagbaligya sa SRP sa tag P110,000 sama sa daghan sab nga mga Sugboanon. Kon para nimo biased na, aw imo sab na. Tarunga lang ang imong mga argumento.
Dayon, nagduda ko nga dunay misteryo ang unang pagbaligya sa SRP kay barato man. Diha sa FB, imo kong gihagit kabahin sa paghisgot sa mga pangurakot. Pistahan kaha ni natong maong transaksyon sa panahon ni Mike, kons. Total, naa man ka sa Konseho isip defender.
Maayo gani kay wa mosunod sa laing opisyal nga niingong moluwat sa katungdanan kon makakitag buyer ang mayor.
Interesado ko karon mangutana sab sa SM ug Ayala land kon unsay ilang baruganan karong maklaro na nga kwestyonable gyud diay ang ilang pagsalmot sa bargain sale sa SRP.
Sukwahi sa punto sa usa ka tigpanalipod sa maong bargain sale, di man terorismo kon ang mga Sugboanon moreklamo nga alkansi sila sa maong transaksyon.
Ang nakasubo kay daw nabuta sa politika ang pipila. Sa ilang kasuko kang Mayor Osmeña, magsigi na lang pag-imbentog pasangil batok niining umaabot nga bidding nga mas makaayo man kini sa syudad.
Ang ako lang unta ba, nganong di na man lang suportahan ang ingon niining mga positibong lakang sa administrasyon.
(@anol_cebu sa Twitter)