DUHA ka magsuon nga mga bata ang nagsuka ug kalibang human giingon nakakaon og imported nga delatang sud-an sa Barangay Camoboan, lungsod sa Tabogon, Sugbo.

Apan ang doktor sa Provincial Health Office (PHO) di makasulti nga nalanag sa gikaon nga de lata ang magsuong 5 anyos nga babaye ug kapin usa ka tuig nga la­lake.

Ang duha gidala sa Juan Dosado Memorial Hospital sa lungsod sa Sogod sa niaging kaadlawon human giingong nagsige og suka ug kalibang.

Si Dr. Mario Joyag, medical officer sa PHO, niingon nga hinatag sa silingan sa mga bata ang imported nga delata nga tuna nga maoy gipanihapon sa pamilya.

Matod niya, base sa iyang nadawat nga report gikan sa ospital, apil sa nakakaon sa delata ang amahan apan wa kini maapektahan.

“Kon moingon ta nagkalibanga sila duha pero naa may laing miyembro sa pamilya nga nakakaon nga wala naapektahan. Mao nang di ta ka-confirm nga food poisoning,” matod ni Joyag.

Siya nidugang nga usa lang ka kaso sa acute gastroentiritis ang nahitabo sa mga magsuon.

Sa lata, makita ang expiration date sa tuna nga June 2015.

Apan suma pa ni Joyag nga di siya makasulti nga expired na ang pagkaon tungod kay wa pa matapos ang Hunyo.

Sa report sa TV5, si Maribeth Itang, ang silingan nga nihatag sa delata, nagtuo nga wala pa ma-expired ang tuna sanglit ila pa kini gisud-an sa pamahaw.

Apan ang apohan nga lalake sa mga bata nga si Jose Monares nga naghukom nga dad-on sa ospital ang iyang mga apo, nagtuo nga ang delatang tuna maoy nakaingon sa pagsuka ug kalibang sa iyang mga apo.

“(Mga bata) pag-abot sa ospital mao tong gi-resuscitate, gi-fluid chal­lenge mao tong karon stable na sila, nag-recuperate,” asoy ni Joyag.