Ernesto D. Lariosa
San Fernando, Cebu
KADAGHAN na siyang nakigduwa sa iyang anino. Hagit kaniya ang paggunit bisan ang iyang tudlo nga ganiha gitulisok niya kang Laurean nga nanghambog nga siya ra ang makadakop sa ‘killer’. Wa man gani siya makahimo nga kanunay siyang nagpraktis pagdakop sa iyang anino. Siya pa kaha nga nagsige lag inom og tuba sa tindahan ni Insi Modi. Palahubog kaayo.
Matod ni Ingko Sideo nga tambalan, ang makadakop sa ‘killer’ kadto rang makadakop sa iyang anino. Nakahagit ni sa iyang pagka pulis nga sultia. Kinsa guy makadakop og anino? Apan, matod ni Ingko Sideo diha kunoy nakadakop sa sigeg praktis ug hinuktok.
Gipatay man gud ang iyang ig-agaw nga usa ka ‘self-styled whistle-blower’ nga sige lag pasangil nga ang mga kawani sa lungsod apil na ang mga konsehal mga kurakot kuno kaayo. Hasta silang mga pulis ingnon pang mga ‘drug addict’.
“Ayaw anang estoryaha, Gaw, wa kay ebidensiya ikapakita, Ako, adik diay?” Misingka si PO3 Anselmo Tukmo.
“Ikaw tingali dili, pero kanang imong mga kauban tigpakaaron-ingnon kaayo morag korek. Ayuha nang inyong trabaho, uy! Naay mga ‘killing’ dinhi sa ato way sulbad-sulbad. Kadako na ninyog suweldo.” Gitan-aw niya ang nawong sa iyang ig-agaw nga maayong lamparuhon.
Nanabi pa kini nga ang mga dagkong opisyal sa lungsod manawat og suborno sa mga kumpaniya nga magnegusyo sa lungsod. Mga wa kunoy uwaw angay nga di butahan sunod piniliay. Usa ka adlaw niana nawa lag kalit ang iyang ig-agaw. Iyang nahibaw-an nga nag-radio commentator. Way giliatan ang mga opisyal sa dakbayan sa iyang mga atake.
Na-popular ang iyang ig-agaw kay daghang maminaw sa iyang programa. Sa pista sa ilang barangay nipauli ang iyang ig-agaw. Mao to sa diskuhan samtang nagsayaw gipusil kini. Nakita nga ang nagpusil nag-bonnet nga misakay dayon sa motorsiklo nga lain ang nagdrayb. Sa ato pa riding in tandem gihapon ang ‘killer’. Misinggit pa ang ‘killer’. “ Panuyop pa mo!”
Kabuang sa ‘killer’. Kadtong iyang ig-agaw palainom apan di ‘drug addict’. Pasangil lang aron maligaw silang kapulisan. Midagan ang mga buwan nagsawom gihapon silag malubog mahitungod sa ‘killer’. Mao tong mitanyag og ganti nga P1 Million ang tagtungod sa makatug-an sa ‘killer’. Nanggimok ang mga tawo. Usa niini si Laurean nga palahubog nga sige lag panghambog nga siya ang makadakop kay nakaila siya sa ‘killer’ ug sa ‘mastermind.’
USA ka madulom nga gabii giduaw siya sa tambalan nga mitambag niya sa paghunong na lang sa pagdakop sa iyang anino kay wa siyay mahimo sa kamatuoran nga di gyud madakop ang anino bisag unsaon.
“Ayaw na lang tong gamita ang gitudlo kong yamyamon, Sir. Madakop pa nimo ang anino kon mopahuway ka.” Giprangkahan siya ni Ingko Sideo. Nakahinuktok siya. Lisod tuod pagdakop og ‘killer’ ning panahuna sama sa iyang anino.
“Ayaw lang kabalaka, Sir, kay kinsa kadtong mopatay, patyon isab sa umaabot nga adlaw, kini ang barahan sa kinabuhi.” Milawom pagsamot ang iyang paghinuktok sa gisulti sa tambalan. Apan pangitaon gihapon niya ang killer sa iyang ig-agaw kay iyang katungdanan. (Katapusan)