Sugilanon: Ang sanggutan ni tatay

Fred Fuentes Monternel

Lorega Proper, Cebu City

NING buntaga giani­naw ko ang napulo ka punoan sa lubing dahili nga kanhi mao ang sanggutan ni anhing Tatay Vidal sa among banika. Nagpabilin gihapon ang sanggutan. Ug abi nakog si tatay ang nakita kong nanawat og tuba sa sanggutan ning buntaga. Maong gikipat-kipat ko ang akong mga mata. Nanumbalay sa akong panumdoman si Tatay Vidal nga naghimog bangkelya sa panginabuhian ang pagpananggot.

Mubo ug gamay nga tawo si Tatay Vidal, apan mestisuhon. Hilumon siya ug kugihan nga bisan unsay isugo kaniya si anhing Nanay Tutay, dili gayud mobalibad. Panguma ang gisaligang panginabuhian nilang tatay ug nanay diha sa among banika. Gipili ni tatay nga mananggot sa mga lubing dahili kay mugbo kinig punoan ug dili na kinahanglan nga mokatkat pa sa punoan inig pananggot. Nagkinahanglan lang siya og mubo nga hagdanan aron makab-ot ang bungol sa lubi nga maoy abison. Makab-ot lang sab ang sugong nga maoy isanggab sa bungol human limpyohi sa pitlagong ug human butangig tungog. Daghan og tuba ang sanggutan ni tatay. Magluya ang iyang lawas kon dili makainom og tuba matag adlaw.

“Tam-isa sa dal-as mong tuba nga bag-ong dawat, Tay, uy!” matod ko usa ka buntag niana. Naanad na sab kong moinom sa bag-ong dawat nga tuba ni tatay inigka human sa pamahaw. Dayon nanglakaw mi paingon sa elementaryang eskuylahan sa among baryo – ako kuyog sa duha ko ka magulang nga sila si Day Celing ug Do Juan, kinsa manginom sab sa tam-is nga tuba ni Tatay Vidal. Kanamong tulo, ako ang pinangga ni tatay kay ako ang kinamanghuran ug liwat ko niya.

“Dong Fred, duha ka templada ang dawaton kong tuba matag adlaw. Dunay tam-is; dunay kisumkisom. Ang tuba pakundisyon gayud sa lawas. Mao bitawng abtik ko modaro, moguna, mangahoy ug magsinangay og duha ka tarong tubig matag adlaw. Mao nga samtang abtik pa ko di ko gyud biyaan ang akong sanggutan. Makabangkelya ni atong panginabuhian. Lalim bay makatumod kog taglima ka galon sa suking tindahan sa baryo ug makahatag ko nimog sensiyong alawans matag adlaw.,” ni Tatay Vidal nga nagdayeg sa iyang kaugalingon.

Miyanguyango ko. Tungod sa iyang sanggutan di gyud mawad-an og sensiyo ang akong bulsa matag adlaw. Makapalit kog siyakoy ug ensaymadang pan sa akong suking tindahan atbang sa among eskuylahan. Ug belib sab ko ni tatay. Sukad sa gagmay pa ming mga bata ug hangtod nga naka gradwar na mi sa hayiskol, wa gyud mi makatilaw og kusi ug latos gikan kang tatay. Mas si Nanay Tutay nga kusog nga molatos ug mobunal kanamong tulo ginamit ang sanga sa bayabas kon mosipyat mig diyutay sa iyang gisugo namo.

Gikipatkipat ang akong mga mata ning buntaga nga nagtan-aw sa tawo nga nanangko sa tuba sa sanggutan ni tatay nga mga lubing dahili. Una karong adlaw sa akong bakasyon dinhi sa banika human sa kinse ka tuig nga nahilayo ko ning dapita nga una kong namat-an og kahayag. Naklaro nako nga dili na si Tatay Vidal ang nanawat og tuba sa sanggutan kundili si Noy Cesar, ang bana ni Day Celing. Mihangad ko sa langit, namasin nga makita ko ang imahe ni tatay sa panganod. (KATAPUSAN)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph