USA ka babaye nasi­kop sud sa mall sa dakba­yan sa Sugbo human gisuwayan pagsalisi ang bag sa usa ka kostu­mer sa usa ka restaurant niadtong Mi­yerkules sa udto.

Ang 54-anyos nga suspek giila nga si Celine Yap Mendez, lumad nga taga Ormoc City ug kaniadto nadakpan sa susamang modus.

Ang biktima giila nga si Wenefreda Misa, 31, lumolupyo sa Lipata, Minglanilla kinsa nakuhaan sa iyang bag samtang naniudto sa Sbarro sulod sa Ayala Center Cebu.

Daling nakasiyagit si Misa hinungdan nga da­li usab nga nadakpan si Mendez sa guwardiya diha sa maong mall.

Samtang 25 minutos saw a pa ang hitabo, nakahigayon usab og salisi ang grupo ni Mendez sa usa ka kan-anan sa dan Escario sa Camputhaw ning dakbayan sa Sugbo.

Usa ka Emery Sun Lee, 69, nakuhaan sa iyang bag nga adunay sulod nga cash ug mga kabtangan nga gibana-banang nagkantidad og P70,000.

Na-recover kini human masikop si Mendez.

Matod ni Chief Inspector David Señor sa Theft and Robbery Section sa Cebu City Police Office nga aduna’y kuyog nga laing tulo ka mga lalake ang suspek apan dihang gidakop na kini sa guwardiya sa maong mall, dali nga nakadagan ang tulo nga wa pa madakpi.

Nitataw pa si Mendez nga nagsugod siya niining matang sa modus niadtong Enero apan hunong-hunong kini aron di dali nga madakpan.

Viral Video

Samtang naila na usab sa kapulisan ang duha sa tulo ka mga suspek sa ni-viral nga video sa social networking site nga Facebook sa laing salisi gang sulod sa kan-anan sa dan F. Cabahug sa Mabolo ning dakbayan.

Ang duha ka mga kawatan nga giingon nga grupo nga naggikan sa Mindanao mao sila si Abdul Jabar ug Hadsan Linalog, mao usab ang leader sa maong grupo.

Usa ka 55-anyos nga buy-and-sell businessman ang biktima sa grupo nga di magpangalan, niingon nga padulong unta siya mosweldo niadtong higayona apan nasalisi siya.

Nahitabo ang maong pagsalisi niadtong Mayo 30 sa Burger King sa maong lugar diin nadala sa mga kawatan ang P30,000 nga cash, duha ka iPhone 5, Cross ballpen ug eyeglass nga mahalon.

Laglag Barya

Gamit ang video o hu­­lagway nga gi-post sa Face­book tungod kay nai­la na usab ang tulo ka mga lalake nga sakop sa tirtir o laglag barya gang nga nisuway pagkawat sa butang sa babaye pinaagi sa iyang bag sulod sa public utility jeepney nga 13C.

Naila ang tulo nga sila si Rodel Gaban, kinsa mao ang nihulog sa sinsilyo aron makuha ang atensiyon sa biktima nga babaye.

Si Apolonio “Botchoi” Tolibas kinsa nisuway pagsulod sa iyang kamot sa shoulder bag sa biktima ug si Isidro Dabudo kinsa mao ang lookout sa duruha.

Matod ni Señor nga naaresto na usab ang maong mga suspek sa susamang modus apan tungod kay mamahimo ra sila nga makapiyansa, makagawas ra gihapon.

Dugang niini nga ang tulo gikan kini sa Min­danao.

Giawhag ni Señor ang tanang sumasakay hilabi na sa pampubliko nga sak­yanan nga magbantay ka­nunay sa ilang kasakay. (Dugang taho ni DTJ sa Sun.Star Cebu)