NAHIMONG kontrobersyal ang resulta sa away nila Australian boxer Jeff “Hornet” Horn (17-0-1, 11 knockouts) ug Manny Pacquiao (59-7-2, 38 knockouts) tungod kadaghanan sa mga boxing experts ang nagtuo nga modaug ang Pinoy champ sa Battle of Brisbane.
Ang judge nga si Woleska Roldan miiskor sa action-packed fight nga 117-111 pabor kang Horn.
Sila Chris Flores ug Roman Cerdan parehong mihatag sab kang Horn sa ilang scorecards nga 115-113 alang sa unanimous decision.
Gisaway sab sa kadaghanan ang pagka-"bully" ug hugaw nga duwa ni Horn.
Ang duha ka samad sa ulo ni Manny gikan sa headbutt ni Horn.
Ang pipila ka boxing experts sa higanteng sports channel nga ESPN nga maoy nagdala sa away sa Amerika mipabor kang Pacman nga maoy daug sa walo ka rounds samtang upat lang ka rounds kang Horn.
Bisan ang ESPN ringside analyst nga si Teddy Atlas ug trainer ni Tim Bradley alang sab kang Pacquiao ang away, 116-111.
Daghan sa 50,000 mga fans sa stadium ang nakurat sa judges decision diin bisan si Horn ug team niya di makatuo.
"That's the decision of the judges. I respect that," ni Pacquiao.
Alang sab kang Jeff, nga mas nahimong agresibo siya sa away, "I thought I was coming forward more and landing the cleaner blows’. That's just my opinion."
Daghang sports personalities ang di sab makatuo sa pagkadaug sa Australian boxer.
Pipila na dinhi sila kanhi National Basketball Association (NBA) star Kobe Bryant ug kanhi world heavyweight champion Lennox Lewis.
Di sila kombinsido sa desisyon sa tulo ka hurado nga hatagan ang kanhi school teacher nga si Horn sa maong puntos.
"This is what's wrong with boxing. Horn was very game but I’m hard pressed to see how he could have won that fight by any stretch!" ni Lewis.
Nag-tweet sab si Bryant og GIF ni Ice Cube nga di makatuo ang nawong.
Bisan ang iladong American sportswriter Bill Simmons nagpahayag sab sa iyang pagkadismaya.
Niya pa sa iyang Twitter account nga kung mahimo dunay Australian boxing judge sa NBA playoff series.
"I wish we had Australian boxing judges for NBA playoff series I think the Celts could have beaten the Cavs," sulti ni Simmons.
Bisan ang mga Dabawenyong netizens, nag-iyahay og post sa ilang Facebook nga nagyawyaw sa kadaugan ni Horn.
Sila nagsulti nga imposible nga modaug si Horn sanglit kanunay siyang masango sa nagpungasi nga kinumo ni Pacquiao. Marizz S. Robilla