NAHAGBA ang kalibutan sa mga Pinoy fans human mapilde si Manny Pacquiao sa kontrobersyal nga desisyon batok sa Australianong si Jeff Horn atol sa ilang WBO World welterweight fight Dominggo, Hunyo 2, didto sa Suncorp Stadium, Brisbane, Australia.
Dinhi sa Cagayan de Oro City, dili makatuo ang mga fans ni Pacquiao human madunggan nila ang desisyon sa ring announcer nga si Michael Buffer nga aduna nay bag-ong world champion.
Nihukom ang tulo ka hurado pabor tanan kang Horn agi sa 117-111 kang Judge Waleska Roldan ug parehas 115-113 gikan nila Chris Flores ug Ramon Cerdan.
Mga fans nga nagtan-aw sa live viewing sa Barangay Nazareth Gym nagbagotbot paggawas human sa away.
Gani ang uban nagpabilin basin nasipyat si Buffer pagbasa sa resulta sama sa nahitabo niadtong Miss Universe 2016 nga nasayop si Steve Harvey pag-anunsyo sa resulta.
“Dili ko motuo sa resulta. Klaro kaayo nga daug si Pacquiao ato nga dagan,” ingon sa usa ka motorela driver nga nihapit ug nakigdungan pagtan-aw sa kapin usa ka libo nga mga manan-away didto sa Nazareth.
Sa ESPN website, sukwahi ang ilang kaugalingon nga score cards. Ang ESPN.com nihatag og 117-111 kang Pacquiao ingon man sab kang ESPN ringside analyst Teddy Atlas nga nihatag og 116-111 alang sa boxing senator.
Mao ra sab ang obserbasyon ug gibati sa naghuot nga manan-away didto sulod sa Misamis Oriental Capitol.
Si Horn pabiling walay tatsa sa iyang boxing career nga adunay 17-0-1 11 knock outs (KOs), samtang si Pacquiao anaa nay 59-7-2, 38 KOs.
Human sa away, makig-rematch ang Pambansang Kamao batok sa bagong kampyon nga si Horn.
Matod ni Pacquiao, naa sa ilang kontrata nga adunay rematch ugaling mapilde siya sa ilang away.
Komento sa usa ka manan-away, kinsa wala magpaila, nga posible daw nga gituis sa mga hurado ang desisyon aron mag-abot na sab sila sa sunod.
“Money matters ra kini tanan, pero kinahanglan andam na si Horn sa ilang rematch kay sigurado nga mobalos ug mas bangis si Pacquiao sa sunod,” matod niya.
Sa ESPN statistics, nilanding si Pacquiao og 182 punches o 32 porsyento sa 573 niyang mga tira. Samtang, si Horn nitala lang og 92 o 15 porsyento sa 623 ka mga labay niya.