MGA sundawo ug kapulisan nga moserbisyo sa eleksiyon karong Mayo 14, gipahinumduman sa Cebu Provincial Commission on Elections (Comelec) nga di mahimong moduol sud sa 50-meter radius gikan sa mga polling places.
Gawas kanila, lakip sa did-an makaduol ug makahimog interaksiyon sa mga botante ang mga incumbent barangay official.
Kaabag sa Comelec sa pagpatunhay sa kahapsay ug kalinaw sa piniliay ang mga police ug military personnel.
Apan taliwala niini, gidid-an sila nga makaduol sa classroom diin mobotar ang mga botante.
Di sab sila mahimong makig-istorya o mohimog bisan unsang interaksiyon kanila.
Gipasabot ni Election Officer Ferdinand Gujilde nga gituyo kini aron di sila makagamit sa ilang awtoridad paghulga o pag-impluwensiya sa mga botante kon kinsay angay botaran.
Mahimo lang silang makaduol kon dunay pagtugot gikan sa Electoral Board, ilabi na usab kon may motumaw nga isyu sa seguridad, sama sa bayolente nga botante, kalit nga pag-brownout panahon sa pag-ihap sa boto ug uban pang kakulian.
Gawas sa mga pulis ug sundawo, di sab mahimong mosud sa 50-meter radius ang kasamtangan nga mga barangay officials, gawas lang kon sila mobotar.
Sama sa mga PNP ug AFP personnel, gustong likayan sa Comelec nga ma-impluwensiyahan nila ang mga tawo sa ilang pagboto.
Sa laing bahin, nagtigum kagahapon sa hapon ang mga tinugyanan sa Comelec ug Provincial Disaster Risk Reduction and Management Office.
Nagpanday sila og contingency plan alang sa posibleng motumaw nga mga emerhensiya o katalagman sa adlaw sa eleksiyon. (AZDL)