KAPULISAN sa siyudad sa Sugbo mohunong na sa ilang imbestigasyon sa nahitabong pagka-missing sa usa ka abogada nga napalgan ra usab human kini gipangita sa iyang bana nga usa usab ka abogado ug wa na nila palawmi pa ang panghitabo.
Una nang naukay ang kapulisan sa siyudad sa Sugbo human gi-report sa bana nga usa ka abogado ang pagka missing sa iyang asawa nga usa usab ka abogada sa milabayng kaadlawon.
Dali nga nangita ang kapulisan sa sakyanan nga gipahibawo ni Atty. Jaamal Calipayan nga maoy gisakyan ni Atty. Sarah nga iyang gidudahan nga adunay dautang nahitabo tungod kay di na makontak ang cellphone niini.
Apan human mipatim-aw si Sarah matod ni P/CInsp. Maria Theresa Macatangay nga wa nay rason nga ilang ipadayon pa ang imbestigasyon.
“Primarily ang report was asa si Attorney Sarah no, and the fact that she already surface so wala na tay pangitaon so what is there to investigate?” matod ni Macatangay.
Wa na usab nila palawmi pa ang imbestigasyon sanglit personal na kaayo kun ila kining buhaton nga di na trabaho sa police ang pagkuha sa kasayuran nga daw sama na nga nangintriga sila sa personal nga kinabuhi sa magtiayon.
Gipanghimakak usab ni Macatangay ang pasangil ug pagsaway sa social media nga mihimo silag special treatment bisan pa man nga wa pa moabot og 24 oras nga na-missing ang abogada gipangita dayon nila kini ug migamit sa daghang pwersa sa kapulisan.
Matod ni Macatangay nga tinuod nga wa moabot ang tagal nga angayan nga mo deklara ang police nga missing person na ang usa ka tawo nga gipangita apan na leksyon na sila sa nahitabo kang Atty. Jonnah John Ungab nga gibanhigan patay sa North Reclamation Area. (AYB)