ARON mas layo sa problema sa trapiko, gibalhin sa Clark ang national finals sa ika-39 nga Milo marathon karong tuiga.
Nakadesider ang Nestle Philippines nga ipahigayon ang maong kalihokan diha sa Clark Development Corporation sa Angeles City.
Si Rio de la Cruz ang Milo Marathon race organizer nagkanayon nga ang bag-ong race location maghatag kini sa kapin 20,000 ka mga runners sa bag-ong hagit, bag-ong rota ug maayo nga kasinatian sa pagdagan nga layo sa trapik sa Metro Manila.
“With these routes, runners will be able to get a chance to enjoy being away from the bustles of Matro Manila traffic. We believe our runners will appreciate this,” matod ni De la Cruz.
Dugang niini nga ang nationwide race maglangkob kini sa 18 ka mga regional legs nga magsugod sa syudad sa Dagupan karon umaabot nga Hunyo 28.
Samtang magpadayon ang elimination leg sa Baguio sa Hulyo 5 ug sundan kini sa Trlac leg sa Hulyo 12 ug Balanga, Bataan sa Hulyo 19.
Samtang ang Manila qualifying ipahigayon kini sa Hulyo 26 diha sa Mall of Asia Arena ground sa Pasay City.
Ang uban legs ipahigayon sa Calapan, Mindoro (Aug. 2), Lipa City (Aug. 9), Naga (Aug. 16), Lucena (Aug. 30), Iloilo (Sept. 20), Bacolod (Sept. 27) , Tagbilaran (Oct. 4), Cebu (Oct. 11), General Santos (Oct. 18), Davao (Nov. 8), Butuan (Nov. 15) ug Cagayan de Oro (Nov. 22).
Ang National Finals ipahigayon sa Dec. 6 sa Angeles City.
Si Andrew Neri sa Milo Sports Marketing Manager nibutyag nga kapin sa 230,000 ka mga runners ang mosalmot sa 18-leg nationwide qualifying races.
Niadtong miaging tuig, nasungkit ni Rafael Poliquit ug Mary Joy Tabal ang kadaugan ug morepresentar sa nasod alang sa 2016 Boston Marathon.