OPISYAL nga gipakita Lunes, Hulyo 3, sa publiko ang logo sa 32nd Kadayawan sa Davao 2017 atol sa launching niini sa ballroom sa Marco Polo Davao.
Mismong si Davao City Mayor Sara Duterte-Carpio ang usa sa mga mipakita niini uban ang 11 ka mga deputy mayors sa mga tribu sa dakbayan ug ang mga Hiyas sa Kadayawan 2016.
Ang logo dunay hulagway sa agila nga maoy nagrepresenta sa siyudad uban sa mga pulong nga maoy nahimong tema karong tuiga, "Stand Tall, United, Resilient" nga nagsimbolo sa panaghiusa sa Dabawenyo diin magmalig-on sa bisan unang mga panghitabo.
"These are challenging times for Mindanao, but as the theme for this year's 32nd Kadayawan sa Dabaw Festival affirms, Dabawenyo will continue to stand tall - strong, united, and resilient," sulti sa mayor.
Dugang sa mayor nga di motugot nga magpuyo sa matag usa ang kahadlok, inay magmaya ug magpasalamat sa mga grasya.
"We will surmount any challenge, as we always have. We will not allow fear to cripple us, nor will we allow those who intend to put us down keep us from celebrating life and giving thanks for all the blessings Davao has been given," dugang niya.
Madasigon sab si Captain Ronald Go, presidente sa Davao City Chamber of Commerce and Industry, Inc., gumikan sa padayong paglambo sa dakbayan pinaagi sa kompiyansa sa mga magpapatigayon sa siyudad nga anaa ang kalinaw.
Sa media launch, gilagda sa memorandum of agreement ang 22 ka mga festival partners isip pagsuporta sa kaugdahan.
Ang week-long celebration sa 32nd Kadayawan sa Davao magsugod Agosto 14 hangtod 20, diin masaksihan ang mga pasundayag gikan sa mga kinaadman ug kultura sa dakbayan. (Jeepy P. Compio)