UNA nakong nahimamat si Boyet Sasuman sa dihang nisayaw siya ug ang iyang Buzybuddies sa Superbalita Anniversary Concert sa Cebu City Sports Complex niadtong tuig 2000. Karong July, 2017, wala lang hibaw-i 18 na diay katuig ang Buzybuddies nga naila sa mga moderno ug jazz nga sayaw. Daghan na ang nigradwar sa ilang mga dancer apan tungod sa gugma ug dedikasyon sa ilang founder ug choreographer padayong nagmagilakon ang pangan sa Buzybuddies. Boyet Sasuman, Ssssuper Ka!
Unsay pinaka-highlight sa imong career sa 18 years?
Tingali katong nakuha ko sa audition ug nahimo kong dancer sa Solid Gold sa ABS-CBN-Manila under Mel Feliciano (kinsa naa na karon sa It’s Showtime) kay mao gyud to’y turning point nako.
Unsay matawag nimong biggest achievement sa Buzybuddies?
Kini nga nakaabot mi og 18 years, which happens to be our anniversary month, kay July 1 man to una ming nisayaw sa former Calesa Bar sa Waterfront Hotel-Mactan and that’s something nga proud kaayo ko isip founder, director and choreographer.
Cebu ra gyud mo?
We’re based in Cebu but naka-show na mi sa Japan, Hongkong and other parts of Asia. Nakapalarga na sad ko og daghang dancers sa abroad. Ang sister ni Tito Mel Feliciano ang ni-refer sa akong pangan sa agency.
Unsay pinaka-bongga ninyong show?
Dili nako kahinumdom sa kadaghan. Kasagaran casino, wedding, debut, corporate, like katong gipakyaw mi sa Globe para mag-show for 4 nights sa Mango One pag-Sinulog 2015.
Kanang mga concert?
Katong June 23, kami nanayaw sa concert nilang Jed Madela ug Darren Espanto sa IC3 Convention Center sa Cebu (kanhi International Eucharistic Congress Pavillion) ug sa Dumaguete concert nila with Morissette last June 16. Pag-Sinulog 2017, kami sad nanayaw sa Unlimited Concert nilang Arnel Pineda, Morissette and Jona sa Waterfront Hotel. Karong July 15, maorag kami sad manayaw sa concert ni Vice Ganda sa Cebu.
Kumusta ang take home pay sa dancers?
Minimal ra jud intawon. Dancers usually do the opening show with a bang, do intermission numbers, back-ups for singers or sometimes being used as live props, pero kumustaha ang kita sa dancers compared to other entertainers like singers, models, comedians, actors? Even sa accommodation kon dunay out of town, lahi jud amoa. Thats why for me, we're the unsung heroes of entertainment.
Maora lagi kag nagmahay?
I’m just expressing my opinion. Kahibawo man ko ang sayaw-sayaw sa Cebu di gyud siya makabuhi, that’s why katong naa pa ko sa Manila, nag-save gyud ko aron maka-negosyo ko bisan gamay. Way gema-gema, kini akong sayaw wa gyud ni nako gi-career. Passion ra ni nako. Wa lang damha niabot mi og 18 years.
Kinsa si Boyet Sasuman kon wala sa dance floor?
Simpol ra kaayo kong pagkatawo, maka-booking lang mi kausa sa usa ka semana, happy na ko. Di man gani ko mo-drive, naa koy sakyanan pero ang akong “papa” ang mo-drive. Haha..
Asa ka tiglaag kon wa moy sayaw?
Balay ra ko.. pero kon Friday, mosimba ko sa Santo Nino kay mao nay akong panaad katong sige og kasakit ang akong parents. My mom is 75, my dad is 80. Then, would you believe naka-composed ko og 10 original songs? The latest is for HuNino unta but wala ko kaabot sa deadline. Naa sad koy entry sa ABS-CBN’s P-Pop Himig Handog Love Songs pero wala lang mada. Hahaha.. But thankful ko sa mga client for always believing in us through the years: Ritchie Mendoza, Beth David, Helbert Canonigo ug sa tanang mga higala ug supporters. Daghang salamat.