HUMAN sa 24 oras nga pagtagotago, nitahan ang suspek sa pagpusil patay sa election officer sa lungsod sa Barili kagahapon sa hapon.
Si Barili Konsehal Julieto Flores nikompirmar nga si Mario “Gilmar” Timagos, mi-surrender ngadto sa iyang duha ka mga igsuon nga mga pulis nga sila si SPO1 Jorve Timagos ug SPO1 Ethelberto Timagos sa bukirang barangay sa Cagay, Barili, alas 3:50 sa hapon.
Si Cresente Hedralin “Chris” S. Flores, election officer sa Barili, ang gipusil patay sa merkado publiko sa Barangay Poblacion alas 2 sa hapon niadtong Lunes.
Ang suspek mao si Gilmar nga nailhan base sa kuha sa closed-circuit television (CCTV) camera nga gitaod sa merkado.
Giingong tungod sa personal nga kasungian ang motibo sa krimen human nagkabingkil ang biktima ug suspek diin ang naulahi gikasohan ni Chris.
Ang biktima, usa ka biyudo, naa gihaya sa ilang panimalay sa Barangay Poblacion, Barili.
Si Julieto niasoy nga nagsugat ang sakyanan nga gikargahan sa lawas ni Chris ug ang patrol car nga gisakyan ni Chris dapit sa Barangay Mantalongon sa dihang dad-on unta sa siyudad sa Sugbo ang suspek. Apan wa na molahos sa siyudad sila si P/Sr. Insp. Jose Angelo Acupinpin.
Si Police Regional Office (PRO) 7 Director Noli Taliño nibutyag nga nagpatabang sila sa duha ka mga igsuong pulis pagpatahan sa ilang igsuon nga si Gilmar.
Si Gilmar giingong nasuko ni Chris human siya gikiha tulo ka tuig na ang nakalabay.
Gipaabot nga mopakanaog na og hukom ang huwes sa mga kaso nga gipasaka batok sa suspek. Siya gihusay sa mga kasong grave threats ug oral defamation nga gisang-at ni Chris batok niini.
Niadtong 2015, ang kapulisan nidakop ni Gilmar human malutsi og warrants of arrest. Siya nakapiyansa.
Matod sa konsehal giingnan siya sa abogado sa suspek nga gitakda ang katapusang hearing karong buwana.
“Morag gitayming ba nga di pa ko makombikto, unhan na lang tika,” pahayag ni Julieto.
Ang lokal nga kagamhanan sa Barili pinaagi ni Mayor Marlon Garcia, mohatag og P50,000 nga tabang pinansiyal ngadto sa pamilya ni Chris.
Himuon kini pinaagi sa resolution nga ipalabang sa Sangguniang Bayan sa session karong adlawa.
Karong Sabado, ilubong si Chris sa sam-ang publiko sa lungsod human sa misa requiem sa Sta. Ana Parish sa alas 12 sa udto.
Kasong pagpatay ang giandam sa kapulisan sa Barili batok ni Gilmar, usa ka drug surrenderer atol sa Oplan Tokhang.
Si Violeta Villordon, assistant ni Chris, ang gitudlo ni Cebu Provincial Election Supervisor Lionel Marco Castillano isip acting election officer.
Way pagtuo si Castillano nga dunay hulga sa mga election officer kay personal ang motibo sa pagpatay kang Flores, di parte sa iyang trabaho.