PIKIT, North Cotabato -- Patay ang usa ka negusyante ug pag-umangkon ni kanhi Maguindanao congressman ug Autonomous Region in Muslim Mindanao Vice Governor Jimmy Matalam human gipusil.
Nahitabo ang pagpamusil alas 4:15 sa hapon niadtong Lunes didto sa Barangay Port, Pikit.
Ang biktima giila nga si Datu Puti Matalam, 34, minyo, buy and sell trader, ug molupyo sa Barangay Poblacion Pagalungan, Maguindanao.
Gibutyag ni Pikit chief of police, Chief Inspector Donald Cabigas nga sakay ang biktima sa iyang motorsiklo gikan sa Pagalungan ug paingon sa bay sa iyang paryente.
Apan pag-abot niya sa Barangay Port, dunay miatang kaniya nga duha ka wala mailhing tawo ug gipusil siya sa ulo ug likod nga bahin sa lawas.
Patay gilayon ang biktima samtang mga mamumuno daling misibat sakay og laing motorsiklo nga way plaka, kolor itom, nga mipaingon sa hilit nga dapit sa lungsod.
Dako ang pagtuo ni Pikit Mayor Sumulong Sultan nga personal nga atraso ang motibo sa pagpatay sa biktima.
Hinuon, kapulisan padayon pa sa ilang imbestigasyon. (Edgar E. Fuerzas)