BARANGAY kapitan nadakpan ug nakuhaan og P1.5 milyunes nga balor sa shabu kagahapon sa buntag sa Barangay Malabago, lungsud sa Badian.
Si Epifania Divinagracia Alvizo, 52, minyo, barangay kapitan sa nahisgutang lugar, nadakpan sa joint buy bust operation sa Philippine Drug Enforcement Agency (PDEA) 7 ug Badian Police Station.
Nadakpan sab ang iyang kakunsabo nga si Ronan Librando,46, ulitawo, kinsa unang nadakpan mga alas 4:30 kagahapon sa buntag sa Sitio Cabiliisan, Brgy. Banhigan sa samang lungsod.
Si Librando gipalitan og duha ka pakiteng shabu sa mga ahente sa PDEA 7 nga mobalor og P1,000.
Dihang nikagat, gisikop ug nakuhaag laing duha ka dagkong bulto sa shabu nga motimbang og 200 gramos nga mobalor og P600,000.
Si PDEA 7 Director Yogi Filemon Ruiz nibutyag sa mga tigbalita nga si Alvizo tulo ka buwan nilang gihimoag imbestigasyon tungod kay kanunay nga motumaw ang ngalan niini kon dunay madakpan.
Tungod sa gilay-on sa lungsod sa Badian, naabtan siyag tulo ka mga bulan una nila natigayon ang buy bust operation.
Gihulagway niya nga high value target level 2 drug pusher ang kapitan nga direkta nga nagkuha sa iyang drugs gikan sa National Bilibid Prisons.
Tungod sa gilay-on sa lungsud sa Badian, naabtan gyud siyag tulo ka bulan una nila natigayon ang buy bust operation.
Si Ruiz nibutyag nga kinilo nga shabu matag semana ang ma dispose sa kapitan sa kalapad sa iyang drugs operations.
Ang drugas tanan nga nakuha sa possession sa kapitan mobalor og P1.5 milyon base sa Dangerous Drugs Board (DDB) value.
Si Ruiz nidugang nga kon basihan ang mga bank account sa passbook, dunay remittance nga tag P1 milyon ngadto sa P2 million ang deposito niini sa upat ka mga passbook ug tulo ka mga ATM cards.
Si Ruiz nitug-an nga ang bana ni Alvizo nga si Marlito, nabilanggo sa National Bilibid Prisons sa Muntinlupa City nabilanggo human sa kasong kidnapping ni negusyante Regan King niadtong 1998.
Matod ni Ruiz nga ila pa karong palawman ang imbestigasyon aron sa pagsubay sa mga kakunsabo sa kapitan.
Ipaubos nila sa forensic examination ang mga nakuha nilang kumunikasyon sa Kapitan.
Dako ang pagtuo ni Ruiz nga sa ila unyang imbestigasyon, makahatag kinig mga impormasyon. Matod niya, daghang mga residente sa Badian ang nangalipay sa pagkasikop sa kapitan.
Si Alvizo nga nahinabi sa Superbalita Cebu hugtananong nanghimakak sa pasangil batok kaniya.
Gipadayag niya nga saksi ang Diyos nga wa siya namaligyag drugas sa ilang lugar.
Nagpadagan siyag sari-sari store, ingon man namaligyag bugas.
Samtang si Badian police station chief Sr. Inspector Bonfacio Pareja niingon nga nabantayan nga niumento ang pagpuyo sa kapitan ug pamilya human mapriso sa NBP.