LIMA ka mga linemen sa Misamis Oriental Electric Service Cooperative (MORESCO-II) ang mikirig human nakuryente dihang misusi sa linya sa kuryente niadtong niaging adlaw sa Barangay Mambiyaan, lungsod sa Balingasag, Misamis Orietal.
Wala ginganlan ang mga biktima kinsa padayon nga nagpaalim sa ilang naangkon diha sa Balingasag Provincial Hospital.
Si Edmundo Moreno kinsa Bise-Presidente sa Moresco-II nga nainterbyu sa usa ka sibyaan sa radyo mi-ingon nga ilang imbestigahan nganong nakuryente ang ilang mga sakop nga aduna man silay gidili nga pagpasiga samtang kamulo og tul-id sa linya ang mga linemen.
Migawas ang report nga deretsong gipaandar sa gwardya sa naasoyng kooperatiba ang feeder hinungdan nakuryente ang mga biktima nga kamulo og tul-id sa dapit.
Gibutyag sa mga nakasaksi nga sa pagkirig sa mga biktima nahulog kini gikan sa poste nga gitungtongan ug gitabangan og dala sa doul nga balay tambalanan sa dapit.
Gibutyag ni Police Senior Inspector Arnold Gaabucayan sa Balingasag Police Station nga daling miresponde sa insidente miingon nga ila usab imbestigahan ang hitabo labina giingong migawas ang report adunay nimando nga paandaron ang sub station feeder.(SVB)