GISUGDAN kagahapong adlaw ang pag-obserbar sa Ramadan diin mao'y tradisyon sa mga Muslim matag tuig.

Kini ang gibutyag National Commission of Muslim Filipinos (NCMF) Northern Mindanao Regional Director Ogie Gandamra ug midugang nga pormal nga gisugdan ang Ramadan kagahapong adlawa ug matapos kini sulod sa 30 ka adlaw.

Gipasabot niini nga ang mga igsuong Muslim mopahigayon og pagpuasa sama sa gidili nga pagkaon sa buntag, moinom ug bisan unsang ilimnong makahubog, dili manigarilyo ug uban pa.

Apan gidugang niini nga pagkahapon niini ila kining himoun.

Gawas sa dili pagkaon sa buntag gidili usab ang pagsulti og mga dili maayong pulong ngadto sa mga silingan, isig katawo tungod kay dako kining kasupakan sa gihimo nga pagpuasa.

Dugang pasabot niini nga ang maong kalihokan usa ka obligatory ug compulsory sa mga igsuong Muslim.

Niini usab ilang himuon ang kanunay ug adlaw-adlaw nga pag-ampo ug rason aron mas mapalambo ang ilang spiritwal nga pagtuo kang Allah.

Gilauman nga matapos kini sa ika-17 nga adlaw sa bulan sa Hulyo nga mao ang selebrasyon sa Eid al-Fitr.

Nanawagan si Gandamra sa mga Kristiyano nga gikinahanglan nila ang moral nga supporta ug pagduyog kanila sa ilang giobserbar aron mamintinar ang kahapsay ug kalinaw denhi sa siyudad sa Cagayan de Oro.(SVB)