MOKANTIDAD og P130-mil ang ginadili nga druga nga nakumpiska gikan sa duha ka mga suspetsado sa drug bust nga gipahigayon niadtong Miyerkules sa udto sa Zone 1, Barangay Kauswagan, Dakbayan sa Cagayan de Oro.

Ang operasyon gihimo sa Philippine Drug Enforcement Agency (PDEA) Northern Mindanao nga miresulta sa pagkasikop sa duha ka mga suspetsado nga gi-ilang sila Jabbar Dagalangit ug Armand Hagingan, pulos residente sa Barangay Carmen ning dakbayan.

Nakuha gikan sa mga suspetsado ang gituohang shabu nga gi-ingong aduna'y gibug-aton nga 65 gramo nga gibana-bana mokantidad og P130 mil.

Gawas niini apil sa nakuha ang uga nga marijuana uban sa mga illegal drug paraphernalia.

Ang mga suspetsado detinado karon sa mini cell sa PDEA Northern Mindanao ang mihimakak nga ingon ana kadaghan ang ginadili nga druga ang nakuha gikan sa ilang posisyon.

Gibutyag ni Hagingan nga nakurat siya sa gi-ingong moabot sa 65 gramo ang ginadili nga druga nga nakuha tungod kay daw igo lang sila gipahapa sa mga agent sa PDEA Northern Mindanao ug giposasan.

Gihimakak usab nila ang alegasyon nga tigpayuhot sa ginadili nga druga.

Ang mga suspetsado gikatakdang pasakaan og kasong supak sa RA 9165 kon ang kalapasan sa Dangerous Drugs Act.