NALAKIP pagkasunog ang 2-anyos nga batang’ lalaki human niulbo ang kalayo kagahapon alas 3:10 sa kadlawon sa Cabigquiz compound, Upper Dagong, Carmen, dakbayan sa Cagayan de Oro nga misunog sa 20 ka balay.

Patay si Nathan Dave Cabigquiz samtang nakaangkon og grabe nga sunog sa kalawasan ang amahan nga si Roger Cabigquiz, usa ka laborer sa Sanitary landfill ning dakbayan.

Angol usab si Angelica Tanusan, kapuyo ni Roger, kinsa pulos anaa sa Northern Mindanao Medical Center (NMMC) ning dakbayan.

Nadala usab sa NMMC si Rudy Cabigquiz, human usab nasunog ang lawas hilabi na sa iyang tiil tungod kay nibalik pa kini sa pagsulod pagpamasin nga aduna pa'y masalba nga mga gamit samtang naangol usab sila si Eusebio Cabigquiz ug Francis Bryan Cabigquiz ug Allex Pasco.

Sa inisyal nga imbestigasyon sa Bureau of Fire and Protection (BFP) Northern Mindanao nasayran nga nagsugod ang kalayo sa panimalay nga gipanag-iyahan nila Roger ug Angelica.

Matod ni Angelica nga nakurat na lamang siya dihang nakamata sa kadako sa buto ug dali nga mikatap ang dakong kalayo.

Dali kaayo nga gilamoy ang ilang panimalay tungod kay ginama lamang kini sa gaan nga mga materyales samtang ang atop niini plastik ug trapal lamang.

Matod ni Angelica nga na-trap sila sulod sa panimalay ug ang anak niini nga usa ka tuig ang nadala pagawas sa maong panimalay apan ang duha ka tuig nga bata ang wala na niini maguniti.

Gi-ingong nadungog pa ni Angelica nga nanawag ang 2-anyos hinungdan nga gipangita kini ni Roger apan tungod sa kakusog sa kalayo ug baga nga aso wala na nakuha ang bata ug napalgan na lang kining nasunog ug wala na'y kinabuhi.

Mi-abot sa ika-duhang alarma ang sunog ug mokabat ngadto sa P100-mil ang natalang danyos.

Sa pagsulat niini nga balita padayon pa ang BFP sa imbestigasiyon aron masuta ang tinuod nga hinungdan sa insidente.

Sa pagkakaron kasamtangang nagpasilong ang mga biktima sulod sa Island kids Foundation Center ug andam nga modawat sa mga tabang nga itunol diha kanila.