SAYOD kita nga mas batan-on ang hitsura og pamarog natong mga Pinay kung itandi sa ubang kababayen-an kay gawas nga maayo kitang mo atiman sa atong lawas, lab-as atong kinaon, maki-uso sab og sul-ob og mga sinena nga bagay sa porma og gidak-on sa lawas. Sa laktod nga pagkasulti, fashionista!
Apan kung ma edad-edaran na, di kalikayan nga ma conscious og sugod sa ipangsul-ob kay magsugod naman og pangunot ang panit labi na sa may liog, tuhod og abaga. Ang bukton sab og di mo burot, mo hiyos nga murag maglanay og bitay. Modaghan na sab ang oban sa buhok og mo lapad o lingin ang porma sa lawas sa katambok ug ka bug-at.
Unsaon man aron mapadayong himsog ug ma-maintain ang lawas?
Diay mga suhistiyon nga akong nabasahan gikan sa lain-laing mga fashion magazines nga mahimong sundon aron di tantong wanggits tan-awon.
Ang pagsul-ob og itom nga sinena, bisag maka pagamay kini tan-awon og elegante ang dating, dili angay pirmihon kay mas makapatiguwang. Lain-laina ang kolor sa sapot nga isul-ob aron kanunay presko tan-awon.
Ayaw mantiniri og mananahi ang imong uniporme sa trabaho kay kada adlaw man kini nimong suoton. Pangita og maayong sastre nga maka-igo sa imong sukod ug porma sa lawas aron di maglusyang tan-awon.
Siguroa nga kung magsul-ob ka og blazer o jacket, di kini magbitay sa abaga o bukton og mo lapas sa kamot aron di ka matabunan sa imong gisul-ob.
Ang insaktong saya hangtod sa tuhod ang gitas-on. Ayaw kini palabii og mubo sama sa mini skirt kay vulgar kining tan-awon. Ayaw sab pasubrahi ka taas nga mura nag momo.
Pagsul-ob og bra nga insakto sa gidak-on sa suso aron di piit ug huot nga mura’g mag-awas sa ka dako. Di sab subra ka luag nga magbitay na.
Ayaw palabi og papiit sa karsones sama sa stretchy jeans aron di magsegi og hiyak, matarong ang pag-ginhawa og malikayan ang sakit sa tiyan sa kahuot ini.
Sa katapusan, ayaw pagsul-ob og heels nga sobra ka taas kay gawas nga maglisod og lakaw, kuyaw pa kini sa taki-ang ug disgrasya.