HAMUGAWAY ug dili na maghuot ang mga tawo nga mohimo og transaksyon sa kagamhanan sa siyudad sa Carcar sa pag-abli na sa bag-ong upat ka andana nga City Hall kagahapon.
Ang P433 milyones nga edipisyo gibuksan atol usab sa ika 10 nga kasaulogan sa pagkahimo nga dakbayan sa Carcar nga gipangunahan ni Mayor Nicepuro Apura.
Ang inagurasyon gibuksan pinaagi sa concelebrated mass nga gipangulohan ni Msgr. Carlito Pono, kura paroko sa Archdiocesan Shrine of St. Catherine of Alexandria nga gipahigayon sa bag-ong city hall.
Sila si Gobernador Hilario Davide III, Bise Gobernador Agnes Magpale, Kong. Gerald Anthony “Samsam” Gullas, Talisay City Mayor Eduardo Gullas ug ubang mga opisyal sa provincial government ang mga dinapit nga bisita.
Sa iyang pakigpulong, ang gobernador niingon nga ang pagbarog sa bag-ong City Hall timaan sa kalamboan sa siyudad sa Carcar.
Si Apura nipahibawo nga 98 porsyento nang nahuman ang city hall nga napatukod pinaagi sa pag-utang sa Development Bank of the Philippines ug paggahin og tipik sa annual budget gikan sa 2015 hangtod sa 2017. Ang utang bayaran sud sa 15 ka tuig nga sugdan og bayad sa 2018.
Matod ni Apura sunod mahuman karong Disyembre ang P355 milyones nga bag-ong merkado publiko nga naa luyo sa bag-ong city hall nga buksan sa unang quarter sa sunod tuig. Katulo ang gidak-on niini kon itandi sa kasamtangan nga merkado.
Isunod usab ang bag-ong terminal ug ang sports complex nga sugdan og tukod sa ikaduhang quarter sa 2018.
Si Apura nagtinguha nga maka-host ang Carcar og Central Visayas Regional Athletic Association (Cviraa) sa 2019 sa dili pa mahuman ang iyang katapusang termino.
Siya nidugang nga nagplano sila gamiton ang daan nga city hall isip library ug mga buhatan sa bag-ong Regional Trial Court ug Municipal Trial Court, mga piskal ug ubang nasudnong mga ahensiya sa gobiyerno.
Suma pa ni Apura nga nagplano sila nga ipahiluna ang national agencies sa bag-ong city center nga mahiluna sud sa 34.7ektarya nga lote sa Barangay Valladolid ug Poblacion3.
Si Mayor Gullas, amahan sa pagkahimong siyudad sa Carcar, niingon nga igo lang siya gigamit isip instrumento.
“Kay ang tinuod nga amahan kay ang mga Carcaranon mismo,” dugang niini.
Si Office of the Presidential Assistant for Visayas Michael Lloyd Dino wa makatambong sa kalihokan apan ang iyang mensahe gibasa sa iyang representante nga si Titus Borromeo.
Sa iyang mensahe, iyang gipahibawo ang mga Carcaranon nga diha sa ilang siyudad magsugod ang Light Rail Transit (LRT) nga motadlas paingon sa siyudad sa Danao.