MATANAO, Davao del Sur - Napulo ka mga masinupakon sa balaod trapiko ang nasikop sa kapulisan sa gimuntar nga checkpoint isip kabahin sa Road Discipline Task Force (RDTF), alas 9:00 sa buntag, Huwebes.
Ang pagmuntar sa checkpoint gipangulohan mismo ni Chief Inspector Yancee Butch Golocan, hepe sa Matanao Municipal Police Station.
Sumala niya nga gimuntar ang checkpoint didto sa provincial road sa Barangay Ceboza, utlanang bahin sa silingang lungsod sa Hagonoy.
Mga nasikop nailhang si Ardiano Mabangis, Lindy Librando, Allan Roldan, Georgie Adlawan, Lydia Colita, Peter Sayson, Joebert Trazona, Jandy Regodon, Mary Grace Tamay, ug Mojajer Bugso.
Nasayran nga sagad sa mga nasikop, nagmaneho nga way driver's license ug wa sab certificate of registration ang ilang mga motorsiklo.
Sumala ni Golocan nga paglapas sa Municipal Ordinance number 186 ug 195 ang salaod sa mga suspek.
Si Golocan nagpahimangno sa tanang motorista nga likayan ang pagmaneho kon way pertinenteng dokumento.
Mas pahugtan sab sa kapulisan ang mga checkpoint sanglit gawas sa RDTF gisugdan na nila ang implementasyon sa Anti-Distracted Driving Act mao nga likayan ang pagmaneho kon mogamit sa bisan unsang gadget.