NAKALITAN kita dihang dungan nga nigawas sa lain-laing mga account ug grupo sa Facebook kining video ni Rene Santiago, usa ka giingong eksperto sa transportasyon, nga niingong dili haom alang sa Syudad sa Sugbo kining Bus Rapid Transit (BRT).
Sa kadugay na nga gituki sa mga eksperto sa Neda ug DOTr kining maong proyekto, kalit nitumaw ang usa ka giingong eksperto nga sukwahi ang iyang baruganan.
Di man unta magkabangi ang proyektong BRT ug ang Light Rail Transit kun LRT apan diay giingong eksperto nga nitumaw nga lahi ang opinion.
Alang kanato, ang BRT usa ka proyekto nga gikan sa Bulacao nga moabot sa Talamban. Buot ipasabot, naa kini sulod sa Syudad sa Sugbo.
Ang LRT, sa laing bahin, mas mahal man ang magasto sa pagtukod niini ug kinahanglang mas layo ang latason. Busa, mas haom kini nga mosumpay sa lain-laing lungsod ug syudad sa Metro Cebu.
Kitang mga Sugboanon nakahibawo nga lahi ra ang Syudad sa Sugbo ug ang Metro Cebu.
Mao nga nisiga akong mga mata, niisa akong kilay, ug hapit ko mahagbong sa akong gilingkoran dihang atong nakita sa slide presentation ni Rene Santiago ang paggamit og mga statistics sa mga pasahero nga gikutlo sa tibuok Metro Cebu aron moinsister nga di mahimo ang BRT sulod sa Syudad sa Sugbo.
Bisan dili kita eksperto sa transportasyon apan di man intawon angay lalison nga lahi ra ang Syudad sa Sugbo ug ang Metro Cebu.
Unsa may nasulod sa utok niining giingong eksperto nga basic man kaayo kini nga sayop?
Unang posibleng hinungdan mao ang iyang di pagka Sugboanon. Taga Manila man kini ug feeling maayong-laki kini sila bisan og way alamag. Sa Iningles nako nga kulom, nakaingon ko nga nagsul-ob og “Imperial Manila blinders.”
Ikaduhang posibleng hinungdan nga gituyo gyud sa paggamit sa maong mga statistics kay nagtuo siyang malipat kita.
Gamay ang dalan?
Usa sa gibalikbalik nga punto karon mao ang kagamay sa kadalanan sa Syudad sa Sugbo. Mosamot kuno kahuot ang dalan kon gamiton sa BRT ang duha ka tunga nga lane.
Mao kini ang punto ni Santiago nga nagbonggo sa iyang kaugalingon nga wala siya masuweto sa detalye sa BRT plans sa Syudad sa Sugbo.
Tipik man intawon sa maong plano ang pagpalapad sa yuta.
Mao nga ang mga punto sa mga torotot nga anti-BRT sayon rang suphon ug tapihon. Hangtod nga usa ka troll igo na lang mobugalbugal ngano kunong ang tamdan nako mao ang mga mantalaan. Pagka hanggaw.