NAGSUGOD sa damgo o pangandoy hangtod natuman ug natinuod ang mga proyekto sa kagamhanan sa siyudad sa Carcar, sumala ni Mayor Nicepuro Apura.
Ang mayor niyagyag sa mga proyekto, programa ug kalamboan nga nahatod sa dakbayan ngadto sa mga molupyo sa miaging usa ka tuig sa iyang ikapito nga State of the City Address (Soca) niadtong Biyernes sa gabii.
Kini dungan usab sa ika 10 nga kasaulogan sa pagkahimong siyudad sa Carcar.
Si Apura nga naa sa iyang ikatulo ug katapusang termino pagka mayor, nihulagway sa iyang kaugalingon nga sama sa usa ka hait nga tigib.
“Dili tigib nga kuwang sa subo nga usa ka dukdok, mountol… Bisan pa tuod sa mga hagit, mga challenges, nakahibawo man mo, nia lang ko gihapon tungod kay inyo akong gisaligan, inyoha ming gisaligan,” pahayag sa mayor sa iyang pagpamulong sa Soca.
Siya namahayag nga nahimo sa mga Carcaranon ang katumanan sa damgo, “because we built this city.”
Matod ni Apura instrumento lang siya sa katumanan sa gidamgo nga mga proyekto alang sa dakbayan nga gihulagway nga padayon ang pag-uswag.
Usa sa labing dako nga mga proyekto nga nakab-ot sa administrasyon ni Apura ang P433 milyones nga bag-ong city hall.
Ang upat ka andana nga edipisyo kay fully-airconditioned ang mga buhatan, may elevator, lactating rooms alang sa mga inahan, child-minding rooms, pacilidad alang sa mga persons with disability sama sa ramps ug PWD-friendly nga restrooms.
Laing dakong proyekto sa dakbayan ang hapit na mahuman nga merkado publiko, terminal ug city center nga nahiluna sud sa 34.7 ektarya nga lote sa mga barangay Poblacion 3 ug Valladolid.
Nahuman na usab ang edipisyo diin atimanon ang mga children in conflict with the law.
Sa social services, 1,500 ka mga indibidwal ang nahatagan og Philhealth cards sa siyudad, samtang 16,663 ka beneficiaries ang nahatagan sa nasudnong kagamhanan.
Nakahatag usab ang dakbayan og P2 milyones alang sa libreng tambal alang sa mga senior citizen ug persons with disability.
Ubos sa social services sa panglawas, 1,353 ka mga inahan ang nahatagan og libreng pre natal services; 2,658 ka mga masuso ang nahatagan og libreng bakuna; 13,979 ka mga bata ang nahatagan og Vitamin A supplement.
Sud sa kapin 50 minutos nga Soca, ang mayor nipahibawo sa natuman nga mga proyekto ug kalamboan sa imprastruktura, edukasyon, social services, environmental protection, peace and order, disaster preparedness, ug institutionalizing purok system.
Iya usab gipahibawo ang padayong pagpatuman sa mga programa sama sa paghatag og libreng lungon, ug embalsamar sa mga nangamatay; materyales sa paghimo og kasilyas; financial assistance sa mga senior citizen ug scholarships alang sa kabataan ug ubang mga kaayohan nga makatabang sa mga molupyo sa Carcar.
Human sa Soca, gisunod ang mubo nga programa diin may nanayaw ug nanganta nga gisalmotan ni Apura ug ubang mga opisyal ug empleyado sa dakbayan, dayon gisunod ang dul-an 10 minutos nga fireworks display.