Reluya naguol sa 3 ka konsehal

NASUBO si San Fernando Ma­yor Lakambini “Nenette” Reluya sa pagkasikop sa tulo ka mga konsehal sa ilang lungsod sa mga sakop sa Police Regional Office 7 ug Cebu Provincial Police Office niadtong Biyernes gumikan sa giingong kalambigitan niini sa gidili nga drugas.

Ang mayor namahayag nga sila si Alfonso Donaire IV ug Edwin Villaver, mga elected nga konsehal ug Johnny Arriesgado, presidente sa Association of Barangay Council (ABC), kay mga kaalyado sa miaging administrasyon.

Ang tulo ka mga konsehal gi­dakop sa kapulisan sa managla­hi nga mga ronda sa lungsod sa San Fernando, nibalhin sa gru­po ni Reluya sa dihang naghina­ngat na ang piniliay sa miaging tuig.

Si Police Regional Office Director Chief Supt. Noli Taliño nihulagway sa tulo ka mga konsehal nga mga drug protector.

Si Reluya nidugang nga du­nay walo ka mga piniling sakop sa konseho sa lungsod ug duha lang niini ang ubos sa iyang grupo. Ang laing unom gikan sa iyang kaatbang sa pulitika.

Siya nidugang nga bisan ang kasamtangan nga bise mayor, Fralz Sabalones, running mate sa iyang kaatbang, apan kini nitabang ug nakiglambigit sa iyang administrasyon kauban ang mga sakop sa konseho nga nagpalabang og mga ordinansa ug resolusyon alang sa kalamboan sa lungsod.

Si Department of Interior and Local Government (DILG) 7 Director Rene Burdeos nii­ngon maka-function ug maka-quorom gihapon ang Sangguniang Bayan bisan sa pagkasikop sa tulo ka mga konsehal sanglit duna pay nahabilin nga 6 ka mga konsehal.

Ang SB sa San Fernando gilangkoban sa walo ka mga elected nga konsehal, ug usa ka presidente sa Association of Barangay Council. Way labot sa ihap ang Sangguniang Kabataan.

Si Burdeos namahayag ang pagkasikop sa tulo magsilbi nga panag-ingnan sa ubang mga opisyal nga nalambigit sa gidili nga drugas.

“We are under the Code of E­­­thics. They are expected to perform norms of conduct,” dugang niini.

Siya nibutyag nga dihang nilingkod sa pwesto si Presidente Rodrigo Duterte sa miaging tuig nakadawat siya og confidential report bahin sa mga opisyal nga nalambigit sa gidili nga drugas.

Apan wa siya makahinumdom kon naapil ba ang pangan sa tulo ka mga konsehal sa San Fernando sa kadaghan nga naa sa listahan nga iyang giduso sa ilang ulohang buhatan.