DIHAY daghang panahon nga di molihok ang mga kapitan kon way pagtugot ni kanhi mayor Mike Rama. Apan lahi na karon.
Dihang niingon si Presidential Assistant for Visayas Mike Dino nga iyang babagan ang proyekto sa administrasyon nga mao ang Bus Rapid Transit (BRT), awtomatik nga nisabat si ABC President Philip Zafra uban sa mga 40 kapin ka mga barangay kapitan nga kaalyado sa Team Rama.
Abi nako nga nausab na sab ang hunahuna ni Rama kabahin sa maong isyu. Dihang nitingog ang kanhi mayor, pro-BRT man diay gihapon.
Karon ang pangutana: mibiya na ba ang mga kapitan gikan sa Team Rama?
Hinuon, giingong duna kunoy press conference ang kanhi mayor samtang nagsulat ko niining lindog. Maayo unta dunay reporter nga makapangutana niya.
Kon tinuod man ang mga depensa sa mga anti-BRT nga way politika ang ilang pagpanglawgaw karon, badlunga na si Zafra kay klarong pamulitika na iyaha.
Dili unta butangan sab og kolor ang mga lalis.
Ako bitaw, uyon man ko sa BRT ug ang LRT. Ug uyon ko kaayo nga kining duha ka proyekto duna na may blessing sa DOTr ug kang Presidente Duterte.
Di sab maayo nga babagan ang usa ka proyekto nga gisugdan na sa pagpakanaog ug ilisan niining sunod tuig pa maduso ngadto sa kadagkuan sa Manila.
Gani, malingaw ko sa usa ka diskusyon sa Facebook kay kining molalis nga mas maayo ang LRT kay sa BRT, mag-usab-usab man sa ilang isulti.
Dihang mapiit sila sa punto nga nagkinahanglan sab palapdan ang dalan kon LRT ang tukoron, moingon dayon nga underground man ang LRT nga ilang giduso. Hah? Niingon mo nga pareho sa LRT sa Manila ang inyong gusto.
LINOG
Naglinog na sab kagahapon sa buntag. Basi sa taho nga naabot kanato, 6.5 sa Richter Scale ang kakusgon sa maong linog.
Ang ako lang masulti kay samtang ang epicentre sa linog tua sa Leyte ug mao kiniy hinungdan nga nangaguba ang mga planta sa kuryente didto, naigo man pag-apil ang Bohol sa blackout.
Aron di mo-blackout ang tibuok Bohol, ang solusyon mao ang paggamit isip tinubdan mao ang Sugbo kay naa may mga power plant dinhi sa atua.
Ang nakaapan kay nakungalan na gani kita kay duna man say supply gikan sa Leyte nga maabot sa ato.
Tungod niini, nakita ang panginahanglan sa dugang mga power plants.
Apan wa ko magpasabot nga gikinahanglan gyud ang coal-fired power plant. Ang punto kay kinahanglang magdugang na kitag mga power plant apan kanang gigamit ang sistema nga di makadaot sa atong kinaiyahan.
Gani, mas maayo nga madayon kining sistema nga waste-to-energy kun W2E diin gamiton ang basura aron maoy mo-denerate og kuryente.
(@anol_cebu sa Twitter)