DAKONG hagit alang sa usa ka mahuyang nga enforcer sa lungsod sa Consolacion, Cebu ang mga sakit nga pulong ug mga bahad sa mga abusadong drayber nga iyang mabadlungan sa karsada matag adlaw.
Sa pakighinabi sa Superbalita Cebu, gibutyag ni Melvin “Melvah” Dumaguit, 31, sa Purok 6, Brgy. Nangka sa maong lungsod nga usa sa iyang di malimtan nga kasinatian mao nga gibaharan siya nga patyon sa usa ka drayber nga wa nihunong sa dihang iyang gipahunong.
Kagahapon, si Melvah ni-renew sa iyang kontrata isip job-order nga enforcer Consolacion Traffic Enforcement and Special Services (CTESS) alang sa sunod nga unom ka buwan.
Sunod buwan, gikatakdang magsaulog siya sa iyang usa ka tuig isip kawaning enforcer sa CTESS.
Lingaw
Sa wa pa siya magtrabaho isip enforcer sa lungsod, si Dumaguit nagsilbi isip care-giver ngadto sa Manila sud sa walo ka tuig.
Sa milabayng tuig niuli siya sa ilang lungsod aron mobakasyon.
"Gusto lang nako (mag-enforcer) para malingaw," ni Dumaguit.
Apan sumala pa niya nga hagit niya sa kanunay ang pagka-enforcer ilabi na niadtong unang buwan niya sa serbisyo tungod kay wa siyay kasinatian sa karsada.
Apan dako niya nga garbo isip us aka miyembro sa LGBT (Lesbian Gay Bisexual and Trangender) community nga nilungtad sa maong trabaho.
“Dako nako nga garbo katong o katong una kay hadlok pa ko. Kuyawan pa ko. Feel nako ig pa stop nako wa ko kahibaw nako if sa luyo nagdagan niya maligsan nuon ko,” sigun pa niya.
Gawas sa pagbantay sa trapiko, di usab mahuman ang adlaw nga di mahimong sayawan ni Dumaguit ang mga motorista.
“Inig stop nako, mangatawa then mohangyo nga pasayawon ka. Then ako sad mogara sad ko. Alegre uy. Bisan kakapoy mawala lang, mawala imung kakapoy bisag stressed na kaayo ka sigeg pito. Mawala kung naay modayed nimu. Di na sad malikayan nga naa say mohatag nimo og Coke, tubig, niya kanang ila kong tagaan og snacks ug burger. Naay mga bayot nga moagi tagaan ko og lipstick, private sakyanan nga kaila ra sad,” paambit niya.
Wa magtuo
Niadtong Agosto sa milbayng tuig atoll sa bakasyon ni Dumaguit sa iyang probinsya, didto nagsugod ang istorya nganung nahimo siyang enforcer.
Sumala pa niya nga nasikop siya sa kalapasan nga no- stopping human nipabulhot ug dagannga nagsunod sa laing sakyanan bisan wa pay go signal sa enforcer. Ang laing sakyanan nakaipsot apan gipahunong siya sa enforcer ug gikuha iyang student permit.
Didto sa buhatan sa CTESS, iyang nahimamat ang panguli niini nga Feliculo Lecciones.
Matod pa ni Dumaguit nga gipangutana siya ni Lecciones kon ganahan ba siya ug trapik u gang iyang gitubag di.
Nangutana si Lecciones kaniya kon gusto ba niya mag-enforcer ug niya pa nga gitandotando lang niya kini aron malukat niya ang iyang motor ug makagawas sa maong buhatan.
“Abi nako komedya ra, tinud-anay sad diay. Pasalamat sad ko uy nga nadawat ko. Human ato pagdawat niya siya mismo ang ni-training nako. Tudluan ko niya to pag man the traffic for two weeks. Hadlok pa gyud pag-una pero karon nalingaw nako,” niya pa.
Wa na mopatim-aw pa sa buhatan sa CTESS si Dumaguit apan gipaadto siya sa kawani ni Lecciones sa ilang balay ug gipasumeter sa iyang biodata.
Gidawat siya sa CTESS ug sa wa pa siya hingpit nanirbisyo isip enforcer, gi-courtesy call pa siya ni Myor Teresa Alegado uban sa iyang labaw.
Niuyon ang mayor nga siya dawaton ug si Lecciones niingon nga putlan lang ang buhok niini apan wa nsugot si Mayor Alegado ug igo lang kini nii-ngon nga papugngan dako usab kini niya nga kalipay.
Giingnan siya sa mayor nga magbinut-an ug magtarong sa iyang trabaho nga maoy iyang gituman.
Higala usab niya iyang mga kauban sa buhat maong wa siyay problema sa pakig-uban niini.
Matag alas 2 sa hapon hangtod sa alas 11 sa gabie, inyong makita sa iyang pwesto si Dumaguit sa may Fooda Consolacion nga nagmaneho sa trapiko. Inyo siyang mailhan nga mag-maroon ug lipstick ug boots.
Pahimangno ni Dumaguit sa ubang drayber nga motuman lang sa balaud trapiko ug respituon ang mga enforcer ilabi na ang sama niya tungod kay di lalim ang ilang trabaho nga tibuok adlaw mabuwad sa init, mabasa sa uwan, hanggap sa abog ug aso.
Ang makapalipay ni Dumaguit matag adlaw bisan sa kakapoy mao ang mga pagdayeg sa iyang pagka-epektibo ug pag-ikid-ikid sa karsada bisan sa kainit sa adlaw.