HUMAN sa kontrobersyal nga kapildihan ni Manny Pacquiao batok kang Jeff Horn sa Brisbane, Australia, nialisngaw og balik ang mga hisgot-hisgot kon angayan na bang moretiro ang Pambansang Kamao sa Pilipinas.
Nagkalainlain ang mga opinsyon sa pipila ka mga kritiko ug bantugang personalidad sa boksing kabahin niini.
Pinaagi sa Twitter, ang ABS-CBN News nagpahigayon og poll aron masuta kon unsa’y panan-aw sa mga Pinoy ning maong isyu.
Sa dul-an sa 4,000 ka mga ningtubag sa poll, aduna’y 76 porsiyento ang miingon nga angayan nang moretiro ang fighting senator sa nasod.
Adunay mga nag-ingon nga kinahanglang motutok na si Pacquiao sa iyang obligasyon isip usa ka senador.
Apan aduna sa’y mga nag-ingon nga ang pulitika nakaapekto sa karera ni Pacquiao sa boksing.
Alang sa uban, kinahanglang magmatngon na si Pacquiao sa iyang panglawas hilabi na sa iyang pangidaron nga 38 ug wala na kini angayang pamatud-an pa.
Ang 8-division world champion gikonsiderar nga usa sa labing maayong boksidor sa kalibutan ug ang mga nakab-ot niini gituohang magpabilin sa panumdoman sa kasaysayan sa boksing.
Sa mga ningbuto, miabot og 24 porsiyento ang nag-ingon nga kinahanglang mopadayon pa og away si Pacquiao aron makahatag og dugang dungog sa nasod.
Alang kanila, mas kinahanglang ipadaplin una ni Pacquiao ang pulitika aron makatutok sa boksing.
Ang trainer ni Pacquiao nga si Freddie Roach nipabuhagay nga nagplano kining makigsulti sa Filipino boxing icon aron kumbensihon kining moretiro na.
Mao sab kini ang pagtuo sa mismong asawa ni Pacquiao nga si Jinkee.