GIUMOL ang balaod nga maoy sumbanan sa pagpatuman aron hapsay ang katilingban. Apan gilapas gumikan sa politikanhong gahom. Pananglitan sa itudlo nga presidente o direktor sa mga lokal nga kolehiyo nagkinahanglan og balido nga appointments o qualifications sa paghupot og career position sa panerbisyo sa gobyerno. Sa Civil Service Commission Memorandum Circular No. 27 nga moretiro sa edad nga 65 matudlo lamang nga co-terminos o non-career nga bulohaton. Dili na pwede sa career position sang­lit makalapas man sa Revised Omnibus Rules on Appointments. Kahinomdoman gikwestyon ang pagtudlo nila ni Dr. Tomas Ramos sa Talisay ug Lapu-lapu City College, Dr. Rodriguez sa Conslacion College, Dr. Rena Duallo sa Buenavista College, Dr. Bonifacio Villanueva sa CTU, Dr. Susana Cabahug sa Mandaue City College 2 ug nangaging presidente sa Community College sa Trinidad, Carcar, Sibonga ug Madridejos. Si Dr. Elmer Quinto Ripalda maoy nagpakabana pagsang-at ngadto sa CSC sa maong kalapasan. Matam-is man o mapait pilit nga tumanon kay mao may balaod.

* * *

Nagplano si Mayor Michael Rama nga magtukod og kolehiyo sa bukiran sa Bonbon. Sa 2008 dunay ordinansa nga mag-umol og Cebu City Community College. Apan wala matukod kay mao ray gisakyan ang CCMC College of Nursing, DMDP Vocational Course ug scholarship program ngadto sa mga pribadong kolehiyo. Lakip sa gikabay-an ang Asian College of Technology (ACT) nga nakontrobersyal kay usa sa mipirma og memorandum of agreement mao ang tag-iya ug konsehal nga si Bebot Abellanosa nga karon kongresista sa south district. Conflict of interest maong naproblema kadtong migraduwar sa ACT kay dili makuha ang Transcript of Records human wala mobayad sa P135M ang kagamhanan sa dakbayan sa Sugbo. Ang Ombudsman mimando sa pagdismis ni Abellanosa sa public service ug posibling mapasakaan og kasong kriminal.

* * *

Gisaway ang DepEd sa dugang duha ka tuig sa batakang edukasyon kay dili pa andam. Apan angay sa pagdayeg ang gihungit nga Alternative Learning System (ALS) nga non-formal education program school-based ug community-based aron makatunob sa elementarya ug high school ang wala makatungha. Sa skills ug livelihood training adto ipasagop sa Technical Education & Skills Development Authority (TESDA). Bintaha kaysa wala maggunok pagtagad sa mga out-of-school. Kay ang kinaadman maoy katigayonan nga labaw pa sa bili sa bulawan.

Samtang nakapahulay na sa kontrobersiya ang Talisay City College gumikan sa politika nag-ilis-ilis og presidente. Gikan ni Ritchel Bacaltos, Dr. Paulus Cañete, CHED 7 Dir. Freddie Bernal, Dr. Joseph Sol Galleon, Dr. Ester Velasquez ug Dr. Gamaliel Vicente Jr. Sa miaging tuig daw nagduwag tubig-tubig ang mga tinun-an ug ginikanan.

(csa_1156@yahoo.com/0905-250-4643)