HUWEBES sa buntag Hunyo 20 ang akong coverage  mao ang lungsod sa Barili. Padung sa maong lungsod nianang buntag diha nakoy nadawat nga mga pasidaan gikan sa Pag-asa labot sa taliabot nga ulan sa pipila ka dapit sa lalawigan.  Ang pasidaan nagagikan kang Engr. Oscar Tabada nga gipaagi sa text. 

Hayag kaayo ang langit sa among pag­biya. Way salimbong. Uga kaayo ang kar­sada nga among gilatas. Pag-agi namo sa Barangay Guadalupe, Carcar City naka­dawat ko ug tawag sa akong higala nga si Ryan Tudtud nga pasahero siya sa V-hire nga nidasmag sa usa ka delivery truck sa usa ka subidahon nga bahin. Apil sab ang pangulo sa Moalboal Fire Station nga si SFO4 Cleto Fullido nga nitabang pagsagang sa nangalabay nga pasahero gikan sa ilang lingkoranan. Dili ulan ang akong nasugatan didto nianang buntag. Pero sa pagbalik nasugamak mi sa grabing ulan  sa maong barangay lahos na ngadto sa may parking sa rotunda sa Carcar. Ulan nga daw di na molabyog ang wiper sa sakyanan gumikan sa kakusog. Di naman gani maklaro ang mga sakyanan nga among gisundan ug gikasugat. Resulta nisanap ang tubig sa karsada ug nihuot ang bul-og sa trapiko. Mao sab ni ang sitwasyon sa ubang dapit sa Sugbo.  Hangtod na sa pagsawop sa adlaw.

Grasya

Matod sa mga mag-uuma sa Carcar nga akong naestorya usa ka dakong grasya gikan sa Kahitas-an ang niabot nga ulan taliwala sa dakong huwaw nga nasinati sud na sa  pipila ka bulan. Manghinaot ta nga sa mosunod nga mga adlaw malukop na ang tibuok kapupud-an sa gipangaliya nga ulan.

Senihan

Ni-cover ko sa gipahigayon nga tigom tali nila ni Mayor Michael Rama ug sa mga operator ug senihan  dinhi sa ato. Kini taliwala sa insidente nga naglambigit ug usa ka senihan sa Ayala Center. Layo ra kaayo sa akong hunahuna nga kini mahitabo. Kay kung buot hunahunaon di man kisame nga mahunlak ang bantayanan kung naa naka sa sud. Para nako linog ug sunog diin magdinaganay ang mga nanan-aw nga moresulta sa duot duot ug niyatakay.

Kaniadtong hinan-aw pa kaayo ko ug seni ang kanu­nay nakong pasiplatan ang nagsiga man nga marka nga exit. Wa ko kahinumdum nga kisame maoy akong hunahunaon kung kanus-a ni mahunlak. Nahitabo naman ni manghinaot ta nga di na ni masubli. Sa mga mahiligon sa pagtan-aw ug seni kinahanglan nga mabinantayon ta kanunay.