PIPILA ka mga ambulant vendors ang nag-rally atubangan sa executive building sa Cebu City Hall niadtong Lunes ug nanawagan sa pagpalagpot sa hepe sa team nga gitahasan sa pagdemolis sa mga illegal nga structures sa mga kadalanan.
Kining maong rally maoy hinungaw sa gipahigayong clearing operations sa N. Bacalso Avenue niadtong Sabado nga nakaapekto sa 100 ka mga ambulant vendors kansang mga structures nibabag na sa sidewalks.
Ang Prevention, Restoration, Order, Beautification and Enhancement (Prove) nga gipangulohan ni Racquel Bohol Arce maoy mipahigayon sa demolition.
Makalibog ning panawagan sa mga sakop sa United Small Vendors of Cebu City (USVCC) nga ipataktak nila si Arce tungod kuno sa mga abuso ug berdugong gihimo niini nga mao ang way puangod nga pagpanakop sa ilang pagpaninda ug pagdagmal sa mga naninda.
Dugang alegasyon sa maong pundok mao ang grabing panamastamas ug ingon man ang pagpangligis sa ilang mga tinda.
Kon tinuod man gani ning maong alegasyon, nganong di man nila pasakaan og kaso si Arce ug kaubanan aron makab-ot ang hustisya nga ilang gipangayo?
Nganong ipaagi pa man nila og rally-rally nga sila sayod mismo nga si Arce igo lang nituman kon unsay mando sa City Hall pinasubay sa balaod?
Ang ilang panawagan nga pagpalagpot ni Arce sa puwesto wa maghatag og kahulogan nga makab-ot nila ang hustisya, kon dili ang ilang katuyoan mao ra gyud ang pagpanimalos sa gibuhat sa Probe nga mao ang pagguba sa ilang illegal nga estraktura.
Wa kaha kini sakyi og pulitika ginamit ang mga militanting pundok? Just asking.