Dear Noy Kulas,
Kining Facebook makaayo ug makadaot sab. Ako si Danny, 41, minyo ug dunay mga anak. Naa ko sa usa sa mga Asian countries nag abroad aron ika support sa akong pamilya. Mao tingali ni ang usa sa mga hinungdan nga natintal ko.
Duna koy childhood crush nga akong na friend sa Facebook. Unya among nahibaw-an sa usag usa nga pareho mig country ug duol ra among gitrabahoan mao to nga nagkita mi. Pila may estorya, ako siyang gisultihan sa tanan nga bata pa mi crush na ko niya. Nikatawa siya kay ganahan diay sab siya nako. Sa laktod nagkauyab mi.
Hangtod nga sa kamingaw namo, dunay nahitabo namo. Sige sige na mi until naka-decide mi nga mag live in while dia mi diri sa abroad. Siya way problema kay buwag na sila sa iyang bana ug gi-process na nila ang annulment. Ako kay love nako ang akong family. Moangkon ko nga kining akoa tambal ra sa kamingaw diri sa gawas.
Siya kay serious sa among relationship kay iyang treatment nako maora na og bana.
Nakonsensya na ko sa akong asawa ug mga anak. Kon manawag sila maora na ko og matuk-an sa konsensya nako. Unsay buhaton?
DANNY
Dan,
Bitaw, kining Facebook makadaut ug makaayo. Depende sa imong paggamit ug pagdala. Daghan nang mga relasyon nga nadaut tungod sa social media. Apan naa ra nang tanan sa usag usa nato kon atong tuyoan.
Sa dihang nagsugod pa unta mo, imo na siyang gisultihan nga di ka ready sa serious nga relationship. Or imo siyang gilikayan kay crush na gud nimo siya. Kana lang klaro na ang padulngan kon sakyan usab sa pikas party. Karon kay iya sab nga gisakyan, nahimo na kini nga dako nga problema. Ang problema nimo kay mahadlok kang masakitan siya, di ba? Wa may tawo nga di masakitan sa panagbuwag. Mao gyud na ang atong huna-hunaon sa pagsulod og ikaduhang relasyon. Andam ka ba nga mobarog niana nga relasyon kon magkinaunsa? Andam ka bang mobiya sa imong pamilya o nianang bayhana? Mao unta ni ang imong gipangutana sa imong kaugalingon.
Imong huna-hunaon ang pikas ug pikas nga masakitan, di kay ang imoha rang kaugalingong katagbawan.
Estoryahe siya sa unsay naa sa imong huna-huna, unsay sulod sa imong kaugalingon. Masakitan man siya o di, kinahanglan nga imo siyang sultihan sa tinuod. Ayaw siya palauma nga hangtod sa hangtod na ang inyoha bisan tuod kon libre na siya puhon. W aka baya moanha diha sa gawas aron mangabit, kon di nianha ka alang sa maayong kaugmaon sa imong pamilya. Mao ni ang huna-hunaa kanunay.
NOY KULAS
(Alang sa imong problema, e-mail sa kulassuper@sunstar.com.ph ug rojval69@yahoo.com)