USA ka Cebu-based party organizer naglaraw nga himuon ang Davao City isip global destination for music festivals.

Isip sinugdanan niini, ang pagpahigayon nila og music festival dinhi atol sa Kadayawan karong Agosto.

Si Kaz Onozawa, nanag-iya sa Spectrum.ph, nagsulti nga human ang sa ilang event dinhi sa nakalabay nga tuig, nakita nila ang potensiyal sa siyudad nga mahimong venue sa samang kalihukan.

Dugang ni Onozawa nga kini ang hinungdan nga nakigpartner sila sa Department of Tourism ug ubang major companies dinhi ug abroad aron dad-on sa Davao ang klase sa music festival nga world-class.

Ang Spectrum.ph nailhan nga nagapahigayon og music festivals lukop nasud.

Duna silay upat ka music festivals matag tuig, kini ang Kadayawan Invasion sa Davao City, Sinulog Invasion sa Cebu City, Masskara Invasion sa Bacolod, ug Dinagyang Invasion sa Iloilo.

Karon nga tuig ang ikaduhang beses nga himuon nila ang music festival dinhi.

Ang una nilang hunat nahitabo human mihatag og kontrobersiyal nga komento ang komedyanteng si Ramon Bautista.

Gidugang ni Onozawa nga nakigpartner sila sa London-based beverage company nga Diageo nga maoy mohatag sa ilimnon atol sa Kadayawan Invasion 2015.

Gipaniguro sab niini nga ipatuman nila ang istriktong sistema aron way menor nga mahatagan sa ilimnong alkohol samtang anaa sa venue nga mao ang Crocodile Park.