COMPOSTELA VALLEY -- Usa ka ulitawo ang nadakpan human malambigit sa gidiling druga.
Misulay pa ang suspek sa paglamoy sa shabu nga gisulod sa usa ka pakite sa selopin apan way suwerte kay nadakpan siya sa pulis.
Nahitabo ang insidente sa kiosk sa WV Gasoline station atubangan sa Provincial Capitol sa Barangay Cabidianan, Nabunturan sa alas 1:10 sa hapon niadtong milabay'ng adlaw.
Ang suspek nailhan nga mao si Arnel Fuentes Payot, 35, ulitawo, way trabaho ug molupyo sa Purok 5, Barangay Sao-Sao, lungsod sa Mawab.
Subay sa taho sa Compostela Valley Provincial Police Office nga nakadawat og taho ang kapulisan sa Nabunturan Municipal Police Station bahin sa kadudahang tawo nga nag-estambay hinungdan nga miresponde gilayon sila sa dapit.
Base sa inisyal nga imbestigasyon, ang suspek wa mahimutang dihang gikompronta ni Police Inspector Molles ug gipangutana kabahin sa iyang personal nga pagkatawo.
Ang suspek nga wala masayud sa buhaton, dunay gipunit sulod sa iyang kolor green nga sling bag ug dayong gipasok sa iyang baba nga nakapapugos sa mga miresponding pulis sa paggunit sa kamot niini ug gipugngan ang liog aron di matulon ang butang nga gilamoy.
Sumala pa nga napugos ang suspek sa pagluwa sa butang nga iyang gipaslak sa baba ug nasuta sa mga pulis nga usa ka heat sealed transparent plastic sachet nga adunay sulod nga white crystalline granules nga gituohang shabu.
Ang suspek lakip ang nakuhang ebidensiya gidala sa kapulisan sa Nabunturan Municipal Police Station alang sa kasong ipasaka batok sa dinakpan. (Dexter T. Visitacion)