DAVAO DEL NORTE -- Patay ang usa ka lalaki samtang angol ang angkas niyang babaye dihang gipamusil sa alas 5:30 sa buntag kagahapon didto sa Pioneer Avenue, Poblacion sa siyudad sa Tagum.
Ang napatay giila nga si Julius Simpron, 53, negusyante ug molupyo sa Piapi Boulevard, siyudad sa Davao.
Nasayran nga si Simpron nagmaneho sa iyang motorsiklo nga Honda XRM nga kolor blue, angkas ang babaye nga naila nga si Andrea Abasolo, 37, minyo g molupyo sa Madayag Mangga, Visayan Village sa siyudad sa Tagum.
Sa inisyal nga imbestigasyon, nasayran nga ang mga nahisgutan nagbaybay lamang sa dalang Pioneer padung sa Crossing sa Magugpo Poblacion.
Apan matud pa, kalit lang giatake sa mga lalaki nga sakay sab sa Honda Wave nga motorsiklo nga wa matino ang plaka subay sa maong direksiyon.
Sa dihang nagtungod na ang ilang mga motorsiklo, gipamusil sila sa mga suspetsado sa makadaghang higayon hinungdan sa pagkahagba sa ilang motorsiklo sa dalan.
Si Simpron nakahiagum og samad pinusilan sa likod nga milahos sa dughan samtang si Abasolo naigo makaduha ka higayon sa tuong bukton.
Dali nga gipangdala ang mga biktima sa Davao Regional Hospital apan wala na matabang pa si Simpron.
Walay nakita nga mga basiyo sa bala sa armas ang kapulisan sa nahitaboan apan nakahipus sila og mga balines sa wala masayring armas.
"Tinitingnan natin ang lahat ng anggulo base sa background ng dalawang biktima para ma-establish natin ang motive," sulti ni Police Inspector Anjanette Tirador, tigpamaba sa Tagum City Police Station.
Gawas nga pulos minyo ang mga biktima, wala pa matino sa kapulisan kon nganong nag-uban ang duruha niadtong tungura.
Padayon pa karong giimbestigahan sa kapulisan sa Tagum City police ang maong hitabo. (Domilyn Ramos Pico)