KIDAPAWAN CITY -- Anaa karon sa grabeng kahimtang ang tulo ka estudyante nga nahugmakan sa pader sa tulunghaan sa alas 9:30 sa buntag niadtong Huwebes didto sa probinsiya sa North Cotabato.
Giila ang mga biktima nga mao sila si Albashir Dagulos, Norhan Dematingkay ug Abdullah Jiasim, mga grade 5 pupil sa Pikit Central Elementary School sa lungsod sa Pikit sa maong probinsiya.
Si Pikit Municipal Police Station chief of police, Senior Inspector Sindatu Karim, nagsulti nga mikatkat ang mga biktima sa pader sa ilang eskuwelahan aron lantawon ang mga sakyanan nga miagi sa kalsada.
Apan kalit lang nahugmak ang pader ug nadat-ugan ang mga bata.
Abtik nga nagresponde ang mga magtutudlo ug mga sibilyan nga namuyo duol sa tulunghaan ug gidala ang mga biktima sa Cruzado Hospital sa Pikit.
Tungod kay grabe ang kahimtang sa tulo, gibalhin dayon sila sa Cotabato Provincial Hospital sa Barangay Amas, Kidapawan City.
Nasayran sa gihimong imbestigasyon nga walay mga kabilya ang pader hinungdan nga dali rang nahugmak kay huyang kini.
Ang maong pader giingong proyekto sa Parent Teachers' Community Association.
Gitahasan na ni Pikit Mayor Muhyren Sultan Casi nga imbestigahan ang maong hitabo samtang nagpaabot na sab ang lokal nga kagamhanan og tabang ngadto sa pamilya sa mga biktima. (Edgar E. Fuerzas)