20 tinun-an nahilo sa 'shake'

BAYNTE ka mga estudyante sa Don Francisco S. Dizon Elementary School (DFSDES) sa Barangay 19-B, Bacaca Road, siyudad sa Davao ang nangalanag sa giinom nga "shake" kagahapon sa udto.

Sa pagpanubay sa SuperBalita, gisulti sa usa ka opisyal sa DFSDES nga nahitabo ang pagkahilo sa mga bata atol sa paniudto.

"Lunch break siya nahitabo, mam, around 12:30 p.m. siya, tinggawas gyud sa mga bata," ni Virginia Beronilla, guidance coordinator sa tunghaan.

Saysay sa magtutudlo nga nakainom ang mga bata og shake nga bubble gum ang flavor nga napalit nila gawas sa tunghaan.

"According sa tag-iya atong shake nga mga upat kabuok ang mipalit sa iyaha. Tapos ang mga bata pag-inom wa kauyon sa lasa, ana pa lain lagi daw og lami mao to gipatilaw sa ilang klasmeyt, mao to tanang nakatilaw, mam, mao toy gipangdala sa ospital," ni Beronilla.

Dugang ni Beronilla nga ang mga estudyante nakasinati og pagpanakit sa ilang tiyan, nagsuka-suka ug dunay nawad-an pa og panimuot tungod sa nahitabo.

Mga estudyante daling gidala sa mga paramedics sa Central 911 padung sa Southern Philippines Medical Center ug Davao Medical School Foundation Inc.

Giangkon ni Beronilla nga matag karon ug unya, ginapahinumdoman nila ang mga kabataan nga di magpataka og pamalit og pagkaon gawas sa tunghaan.

"Everyday gyud na sila gina-remind, mam, sa flag ceremony sultihan ang mga bata nga be careful sa ilang ginakaon, ginapamalit nga pagkaon, pero lagi di nimo makontrol ang mga bata. Like sa nahitabo nga lunch time, ting-gawasay nila," ni Beronilla.

Sa pikas bahin, gihimakak sab sa magtutudlo nga may estudyanteng namatay sa hitabo, niya conscious ang mga bata ug padayon kining giatiman sa mga doktor.

Sa pikas bahin, magpadayon ang imbestigasyon sa hitabo, uban sab dinhi ang tulubagon sa nanag-iya sa maong negusyo nga mibutang sa alanganin sa kahimtang sa mga kabataan.